Sospon ka KHADC ïa u Syiem ka Hima Mylliem ba khlem siew ïa ka khajna ba palat 3000 klur tyngka sha ka Council

Shillong, Jymmang 22 : Ka Khasi Hills Autonomous District Council (KHADC) ba synshar da ka Voice of the People Party (VPP), ka la sospon ïa u Syiem ba pura ka Hima Mylliem u Paiem Ainam Manik Syiem, namar ka jingbym siew ka Hima ïa ka bhah khajna ba 1/8 sha ka Council mynta la phra snem kaba kot palat 3,248 klur tyngka nalor ka bhah khajna ba 10% na ki ïew bala lum da ka Hima ha ki lai snem bala leit.
Ka bhah khajna ba 10% na ki Iew bad ka bhah 1/8 na ka khajna ba ïohlum ka Hima, ka dei ka bhah ba ka KHADC ka ju lum na ki Hima/Elaka kiba don hapoh u pud u sam ka KHADC.
Kane ka jingkhyllie ka KHADC ïa ka khajna jong ka Hima Mylliem, ka dei ka dak kaba pyni ba ka Council ka thmu ban khyllie ïa kiwei pat ki Hima khamtam ki Hima kiba heh bad ba riewspah kum ka Hima Langrin, Maharam, Nongstoin, Nabosohphoh bad kiwei kiwei.
Haba ïakren bad ki Ophisar ka Council (ki bym kwah pynpaw kyrteng), ki la ong ba baroh hi ki Hima/Elaka kim ju siew thikna ïa ka bhah khajna jong ki ïew khamtam eh ka 1/8 share.
“Mynta kiba bun ki Syiem kin sa hap na ki khet bad bun ki Hima/Elaka kin sa ïoh da ki Acting Syiem/ Acting Sirdar/Acting Wahadadar/Acting Lyngdoh bad ter ter” kila ong.
Haba batai ïa ki daw ka jingsospon ïa u Syiem ka Hima Mylliem, ki la ong ba une u Syiem (Ainam Manik Syiem) u khlem lah ban siew ïa ka bhah khajna ba 10% ba lum na ki ïew sha ka Council-kaba dei na ka bynta u snem mang tyngka 2022-23, 2023-24 bad 2024-25 kaba long kat kum ka kyndon 11 (5) jong ka Khasi Hills 9 Establishment, Management and Control of Markets) Regulation Act, 1979.
Ka jingsospon ka long ruh halor ka nongrim ba u Syiem u khlem lah ban siew ïa ka bhah 1/8 na ki khajna ba lum da ka Hima kaba kot haduh T. 3,24,85,020,625 jong u snem mang tyngka 2018-19, 2019-20, 2020-21, 2021-22, 2022-23, 2023-24 bad 2024-25 katkum ka kyndon 9 jong ka Sanad.
Ha ka jingpynbna ba sospon ïa u Bah Ainam Manik Syiem kum u Syiem ka Hima, ka KHADC kala pyntip ba kala thung ïa u Alban Fedrick Syiem kum u Acting Syiem.
Ka KHADC kala bthah ruh ïa u Bah Ainam ba un aiti noh ïa baroh ka pisa, ki kot ki sla bad baroh kiei kiei kiba dei jong ka Hima Mylliem sha u Acting Syiem.
Ka khubor ka ïathuh ba u Bah Ainam u lah ban tynjuh pyrshah ïa kane ka hukum ka KHADC sha ïing Bishar ba shalor.