U samla na Meghalaya uba lajah rngai, u la ïoh ban ïakynduh biang ïa kiba haïing hasem

Shillong, Jymmang 22: U Myntri Rangbah ka Jylla Meghalaya u Conrad K. Sangma ha ka sngi saitjaiñ u la pdiang sngewbha da lade ïa uwei u samla Meghalaya uba la shah pyllait im ha kad liengsuiñ Guwahati hadien ba la wanrah biang ïa u na Jammu bad Kashmir hadien ka jingkynnoh ba u la shah lehbeiñ.
Utei u samla uba la ioh ban pyllait im, la tip kyrteng kum u Genal R. Marak uba na East Khasi Hills district bad la iathuh ba u dei uba trei ha kawei ka Restaurant ha Srinagar la lai snem mynta hapoh ki jinglong jingman kiba shah lehbein.
Katkum ka sorkar Meghalaya, u Genal u la mih na iing ha ka rta kaba 16 snem ban wad kam wad jam bad hadien u la leit sha Kashmir da ka jingiarap jong uwei uba u ithuh.Hadien kata u la ioh kam ha kawei ka restaurant ha Srinagar hynrei la kynnoh ba la kyntait ïa u ban siew ïa ka bainong bad u la shah pynshitom bein ha ka met bad ka jingmut jingpyrkhat jong u trai restaurant bad u khun jong u.
Ïa kane ka jingpyllait im la sdang hadien ba la ioh ïa ka jingkhot jingiarap jong ka sorkar jylla 1971 CM CONNECT ha ka 24 tarik u Ïaiong, 2026.Ki heh sorkar ki la iathuh ba une u samla u la pynpaw ïa ka jingsngewsih kaba jur bad la kynnoh ba u kren shaphang ban shim noh ïa la ka jong ka jingim lada ka jingiarap kam poi ha ka por kaba biang.
Hadien katei ka jingujor, ka kynhun jong ka CM CONNECT ka la iatreilang bad ki heh bad ki bor jong ka ain jong baroh ar tylli ki jylla kata Meghalaya bad ka Jammu and Kashmir ban ioh pyllait im ïa utei u samla.
Ka kynhun ba ïatreilang kaba kynthup ïa u Assistant Labour Commissioner bad ka kynhun Anti-Human Trafficking Unit ha Jammu bad Kashmir hadien ki la lah ban pyllait im ïa u Genal na Srinagar tang hapoh katto katne kynta hadien ka jingwan tuklar, la ïathuh ki heh sorkar.
Ka sorkar Meghalaya ka la thung ruh ïa u majistor ban peit ïa kane ka kam bad ban pyniakynduh biang bad kiba ha iing ha sem jong u.Ka kmie jong u Genal, ka Surobi R. Marak, ha ryngkat ki bahaïing hasem bad u magistrate u Sanjay D. Shira, ki la leit ban shaw ïa u ban wan phai ïing da kaba suk.Ki bor ba dei khmih ki la pynthikna ruh ban pyllait noh ïa ka bai nong jong u kaba dang sahteng shwa ba un wan phai.
Haba kren hadien ba la pdiang sngewbha ïa une u samla ha kad liengsuiñ, u Sangma u la ong ba kane ka mukotduma ka pynpaw kumno ka jingsynshar kaba lah ban ïoh bad ka jingïatreilang kaba kloi ka lah ban pynim ïa ki jingim briew.
“Kane ka long kumno ki rukom treikam bad ki teknoloji kiba suk ki lah ban treikam, bad nga sngewkmen shibun ba ka CM Connect ka lah ban long ka jingshakri bad ka lah ban iarap ban pynim ïa ka jingim jong uwei u briew shimet”, la ong u myntri rangbah.
Ka sorkar Meghalaya ka la ong ba kum kane ka jingjia ka pyni ïa ka bynta jong ka 1971 CM CONNECT platform ym tang kum ka lad ban pynbeit ïa ki jingeh hynrei kum ka lad ban kyrshan kyrkieh ïa ki nongshong shnong kiba don ha ka jingeh.