Ym dei u CM ba ai jamin dei ka ïingbishar ther u Myntri ïa ki jingkynnoh u Nongïalam ka BJP

Shillong, Jymmang 20 : U Myntri Sorkar bad Working President ka NPP Marcuise N Marak ha ka sngi Balang ula ther kylla ïa u nongialam ka BJP bad MDC ka Tura u Bernard N Marak halor ka jingkynnoh ba u Myntri Rangbah Conrad K Sangma u don ka jingïadei ba ïajan bad u MLA barim Esmatur Mominin kaba long ka daw bah halor ka jinglait jamin jong u.
Haba shim ïa kane ka jingkynoh “ ka bym lah ban pdiang da lei lei ruh”, u Marcuise ula ong ba ka Executive ne ka Sorkar kam don bynta eiei ha ki rai jong ka Judiciary ne ïing Bishar.
“Kumta, ka jamin ka dei kaba ai da mano?, Hato dei u Myntri Rangbah ba ai jamin?. Em, ym dei u Myntri Rangbah, ka jamin ka dei kaba ai da ka ïing Bishar” ong u Marcuise haba ïakren bad ki nongthoh khubor.
“Kumta balei u Barnard um kylli ïa ka ïing Bishar ba ong ba u Myntri Rangbah ula ïarap. Ka long kaba khlem nongrim suda. Ka dei ka jingkren ka bym lah ban pdiang. Ka jingkynthoh ka dei tang ban ïalam bakla ïa u paidbah”.
Ula kdew ïa ka jingphiah ïa ka bor treikam hapdeng ka Executive bad ka Judiciary kumba la pruid dak ha ka Riti Synshar.
“Ha ka riti synshar paidbah jong ngi, ka Executive, Judiciary ki dei ki bor treikam kiba trei la la ki jong ki kam. Kat kum ka riti synshar, ka Judiciary kam sngap ïa ka Executive”.
Haba kdew ba ka Sorkar Jylla ruh ka la ïakhun pyrshah ïa ka mukotduma ha ïing Bishar ula ong “Wat ngi ruh ngi don bun ki mukotduma ba dang sahteng ha ki ïing Bishar ïa kaba ngi la ïakhun pyrshah hynrei u Barnard Marak ula kynnoh ïa u Myntri Rangbah ba u ïarap ïa u namar ka jingïoh jamin”.
“Kane ka dei ka bym lah ban pdiang, kaba ïalam bakla na ba ka dei ka judiciary kaba la rai ban ai jamin” ong u Marcuise.