ïaid beit ka jingpyntrei ïa ka ïingdorbar Thaw-aiñ kyrmen ban dep hapoh ka por ba la buh : Lamphang

Shillong, Jymmang 20 : Ka jingpyntrei ia ka ïing Dorbar Thaw Aiñ ba thymmai ha Mawdiangdiang kala ïaid beit kat kum ba la thmu, ong u Lamphang ka ïing Dorbar u Thomas A Sangma ha ka sngi Balang hadien ka jingïalang ban bud dien ïa ka jingtrei ha katei ka jaka.
Ha kane ka jingïalang, kaba la pynïaid da u Lamphang, la wan ban ïashim bynta da u Symbud Myntri Rangbah ba khmih ïa ka Tnad Parliamenatary Affairs u Bah Prestone Tynsong, ki Consultant, ka Project Management Consultant, bad ki Ophisar na ka tnad Public Works Department (PWD), IT Cell bad ka National Informatics Centre (NIC).
Ka jingïalang ka la ïakren sani bha halor ka jingïaid jong ki kam ba la pyntrei bad kiwei kiwei ki kam kiba don jingïadei bad ka project.
Hadien ka jingbishar bniah ïa ki kam ba la trei, u Lamphang ula ong ba “Ka jingïaid jong ki kam la shem ba ki long kiba ihun bad pynpaw ïa ka jingkyrmen ba ka jingpyntrei ïa ka ïing Dorbar Thaw Aiñ ba thymmai kan dep hapoh ka por kaba la buh”.
Haba kynthoh halor ka video ba saphriang dang shen ba ïadei bad ka tnum jong ka ïing Dorbar ba thymmai, u Lamphang ula ong ba kane ka kam ka dei kaba la shu pynheh shaba palat pud bad ong ba kiei kiei kiba jia ki dei kiba sngewsih”.
Haba pdiang ïa ki jingai jingmut, u Lamphang ula maham pyrshah ïa ka jingpyntip ba bakla haba kyntu ïa ki paidbah ba kin kiar na kaba pynphriang lane thep ha ki social media ïa ki jingthoh ba khlem pynthikna kiba lah ban pynsngewthuh bakla bad ba pynjah burom ïa ka tnad treikam jong ka Legislative Assembly.