Nongstoiñ, Jymmang 20 : Na ka bynta ban pynsgewthuh sha ki paitbah halor ka jngkoit jingkhiah da kaba dih ïa ka dud kaba la pynïaid ïew da ki nongdie bad nongpynmih dud ka ophis jong ka Dairy Officer West Khasi hills ha kane ka sngi balang ka 20 tarik Jymmang ka la pynlong ïa ka awareness programe halor ka phang Ka jingmyntoi da kaba dih ïa ka dud bad bam ïa kiwei kiwei ki jingbam ba la shna na ka dud.
Ïa katei ka prokram la pynlong ophis jong ka Dairy Officer ha Nondeiñ (New Nongstoiñ ha kaba la wan ban ïashim bynta da ki nonghikai , ki ophisar sorkar na ki tnad trei kam bapher ba pher bad ki samla pule na ki skul kiba don ha ka thaiñ Nongstoiñ. Ha shuwa ban sdang ïa ka jingpynshai bad ka jingai jinghikai la pdiang sngewbha ïa baroh ki ba wan da ka kong D.L.Mawlong Dairy Officer West Khasi hills ha kaba ka la pynshai ba ïa ka dud lah ban ïoh pahuh tang lada ki paitbah nong shong shnong ki minot ban ri masi. Ha katei ka sngi u Dr.P.Sohlang A.H.& Veterinary Officer u la long u kongsan.
U Dr.Sohlang haba ai jingkren kum u kongsan ha katei ka sngi u la ong ba haduh mynta ka West Khasi hills kam pat lah ban pynbiang dud kat kum ka jingdonkam jong ki paitbah namar ka jingduna palat ki nongri masi. Nalor kata u la ong ba ka jingri ïa ki masi khem dud ka dei kawei na ki lad kamai ka ban kyntiew ïa ka ïoh ka kot jong ki nongshong shnong hapoh ka district.
Utei u ophisar u la ong ruh ba ki jingmyntoi ba ki nong ri masi ki ïoh kam dei tang na ka dud hynrei ka sboh eit masi ka dei kaba don kam haduh katta katta ban pynbha ïa ki jaka rep jaka riang , ban thung jhur thung jhep bad kiwei kiwei Ha kajuh ka por u la kyntu ïa ki nongshong shnong bad ïa ki samla pule ba kin pyntrei kam da ka plan ‘ B’ lada ki kwah ban ïeng ha la ki kjat bad ban kyntiew ïa ka ïoh ka kot , ka kamai kajih jong ki na ka bynta ban kyrshan ïa ka ïng ka sem bad ka lawei jong ki.
