Shillong, Jymmang 20: Ka jingïakhun jong ka Group A hapdeng ka Nongkseh SSCC bad ka Shillong Lajong FC ka la kut ha ka jingïakhaid da mar 1-1 kol ha ka Quarterfinal stage jong ka lympung 5th Meghalaya State League hynne ka janmiet sngi Balang ha madan First Ground-SSA Stadium.
Watla kine ki arliang ki la aireng pyrshah tang ar sngi mynshwa, ha kaba ka Nongkseh ka la khur ïa ka jingjop da 2-0, hynrei ka jinglong jingman jong ka jingïakynduh kaba ar ruh kam shym la duna, ha kaba ki nongkyrshan na baroh arliang ki la tuid biang sha madan ban ai mynsiem ïa la ki jong ki kynhun.
Sa shi sien ki bol pashat naki set-piece ki la paw ba ki dei ki atiar ba kongsan jong ka Nongkseh, ha kaba ka kol kaba la thep nyngkong da u Mebankhraw Wahlang (33’) ka dei kaba la wan lyngba ka bol pashat na ka korner kick ba la shut da u Hardy Cliff Nongbri.
Hynrei ka Lajong ka kham khlaiñ ban tehlakam ïa ka jingïalehkai ban pynïakhaid tang hadien katto katne minit lyngba u Fridison Wanniang (37’).
Ha kawei pat ka jingïakhun, ka Mawlai SC kaba bat ïa ka nam lahduh ka la wanrah ïa ka jingïalehkai kaba bha tam ha ka Quarterfinal stage ban pynliem noh ïa ka Rangdajied United FC da 4-0 kol. Hadien ba shah rem saw sien lynter, ka Rangdajied kam don jingkyrmen shuh ban rung sha ka semifinal watla kane ka lahduh jong u snem 2023 ka dang don sa ar tylli ki jingïalehkai ban pyndep.
Ka Mawlai ka la pynkhihjar lyngba u Basuklang Bina (14′, 39′), u Fairming Suting (66′) bad u Samlang Rympei (90’+4). Ka jingjop ka la rah shipor ïa ki sha ka kyrdan ba ha khlieh duh jong ka Group B, tad haduh ba ka resol jong ka jingïalehkai kaba ar kan tan biang ïa ki sha ka kyrdan kaba lai.
Ki ar tylli ki kol ba u Basuklang u la thep ha kane ka jingïalehkai, ki la pynlong ïa u ban long u nongthep kol ba bun tam jong ka Mawlai ha kane ka MSL da hynriew kol. U la ïoh ban pynkhihjar dang kloi ha ka kylla step bad hadien kata u la thep da ka khlieh ïa ka bol pashat na ka free kick jong u Robertson Khongriah.
Ka RUFC ka la pyni katto katne ka jingkiew ha ka jingïalehkai ba khatduh jong ka, da kaba shah rem ha ka Mawlai da tang 2-1, hynrei kam shym la lah ban leh kumjuh ha ka jingïakhun kaba ar, ha kaba ka la duna bha ha ka rukom pashat bol kaba la pynthut ïa ka jingthmu jong ka kynhun ban tur shakhmat. Ka jingbakla ki rangapdien ka la ailad ïa u Fairming ban pynkhih ïa ka kol kaba lai ha ka kylla miet, nangta u Samlang u la thep ïa kaba saw ha ki minit pynjlan ba khatduh shuwa ban kut.
Ha ka miej, ka Nongkseh ka lamkhmat ha khlieh duh da 8 point, bud ka Lajong ha ka kyrdan ba ar da 7 point, nangta ka Mawlai ha ka kyrdan ba lai da 7 point bad ka Rangdajied shatrai duh (0). Ka SLFC bat ïa ka kyrdan ba ar namar ka don ïa ka rekod jingjop kaba kham bha pyrshah ïa Mawlai (head-to-head).
Ha kane ka sngi, ka Group B kan jam sha ka kylla kaba ar ne ka second leg jong ka Quarter final stage, ha kaba ka Rymbai Shkenshynriah SC kan aireng pyrshah ïa ka Maram FC ha ka por 2 baje nohphai sngi; Ha ka 1st leg ka Shkenshynriah ka la jop da 4-2. Nangta ka Langsning FC kan aireng pyrshah ïa ka Nangkiew Irat SC ha ka por 6 baje janmiet; Ka Nangkiew kan donkam ban wanrah ïa ka jingïakhun kaba bha tam hadien ba shah rem da 6-1 ha ka 1st leg.
