Shillong, Jymmang 20: Ka Meghalaya Athletics Association (MAA) ha ryngkat ka jingïatreilang bad ka Directorate of Sports and Youth Affairs jong ka sorkar Meghalaya, ka la ïoh ban sdang ïa ka State Level Inter-School Athletics Meet 2026 ha SAI STC – NEHU, Shillong.
Kane ka lympung ka thmu ban lumlang ïa ki samla na kylleng ka jylla bad ai ïa ki ka rynsan ban sei madan ïa la ka jong ka sap ba ki don ha ki jingïalehkai bapher bapher.
Ha ka sngi plie ïa kane ka lympung, la ïoh ban pynlong ïa ki jingïakop mareh bad kiwei kiwei de, kynthup ïa ka long jump, high jump, 60m race, 100m race, javelin throw, 600m race, 4x400m relay, long jump (5m runway) bad ka javelin throw (10m runway).
Haba ai jingkren ha ka jingïalang u Working President ka Meghalaya State Olympic Association (MSOA) bah John F. Kharshiing, u la ai khublei ïa ki nongïalehkai kiba la ïoh ïa ka lad ban mihkhmat ïa la ki jong ki District ha kane ka lympung kyrdan jong ka jylla (state-level championship).
“Ka jingdon jong phi hangne hi ka long ka jingpynshisha ïa ka jingtrei shitom, ka jinglong ryntih bad ka jingkut jingmut jong phi,” u la ong, da kaba bynrap ba uwei pa uwei u nongïalehkai uba seisoh u sdang ïa ka jingïaid lynti ha ka kyrdan ïalehkai jong ki skul.
Haba pynshai ïa ka jingdonkam jong ka Athletic, u bah John u la batai ïa ka kum ka nongrim jong baroh ki jingïalehkai, kaba ïarap ïa ki nongialehkai ban pynroi ïa ka jingsted, ka jinglah ban shah, ka jingkhlaiñ. U la pynshlur ïa ki nongïashim bynta ban ïai neh ha ka thong bad kim dei ban duh mynsiem.
“Ka jingïashim bynta hi ka long ka jingjop. Ka jingshlur ban ïalehkai bad ka jingkut jingmut ban ïai bteng ki long ki jinglong ba shisha jong u nongïalehkai ba jop,” u la ong.
U la pyntip ruh sha ki nongïalehkai bad ki kmie ki kpa ba ka jylla Meghalaya kan sa ïoh ban pynlong ïa ka 39th National Games ha u Lber 2027, da kaba batai ïa kane kum ka kabu ha ka histori ïa ka jylla. U Bah John u la ai khublei ïa u Myntri Rangbah ka Jylla Meghalaya u Conrad K. Sangma bad ïa u Myntri ka tnad ïalehkai – bah Wailadmiki Shylla kiba la pynkhlaiñ ïa ka sawdong sawkun jong ka kam ïalehkai lyngba ki jingkyrshan, naduh ki scholarship bad ki jingpynroi ïa ki jingtei haba ïadei bad ka Sports.
U la pyntip ruh ba ka Sorkar ka la nang pynkiew ïa ka khusnam pisa ïa ki nongïalehkai kiba khur takma ksiar ha ki National Level, kumjuh ruh ki nongïalehkai kiba khur takma ha ki National Games, International ki la thikna ban ïoh kam sorkar – ka sienjam kaba u la batai kum ka jingpynshlur kaba khraw ïa ki samla ïalehkai ha kylleng ka Meghalaya.
U la kyntu ïa ki nongïalehkai ban ïashim bynta da ka jinglong hok, ka jinglong ryntih ryngkat ka mynsiem ïalehkai.
“ïa u nongjop ym dei ba la pynmih ha ka jaka kilanmet. U nongjop u mih na ka jingkut jingmut, ka jingangnud bad ka jingthrang ban poi sha ka kyrdan ba ha khlieh duh,” u la ong, haba kitbok kitrwiang ïa ka State Level Inter-School Athletics Meet 2026 kaba seisoh bad ki jingïalehkai kiba sah jingkynmaw
Ha kane ka sngi u bah John F. Kharshiing u la kyntiew ïa ka lama kum ka dak ban plie ïa kane ka jingiakop bad pynbna paidbah ia ka State Level Inter-School Athletics Meet 2026 ka la sdang ha ka jingïadon lang u Assistant Director ka tnad Sports and Youth Affairs u P.B. War Nongbri, DSO, ki ophisar bad kiwei ki riew pawkhmat.
