Shillong, Jymmang 19 : Hadien ba ka election MLA ha Assam ka la kut mynta bad hadien ba la thaw ïa ka sorkar ba thymmai ka sorkar Meghalaya mynta kan sdang banb bud dien biang bad ka Assam ban sdang biang ïa ka jingïakren pynbeit pud bad kumjuh ruh ban ïa pynbeit ïa ki jingïakajia ha Lapangap, ong u Nongpathai khubor ka sorkar u ma Wailadmiki Shylla.
U la ong ruh ba kane ka jingïakajia bad ïapher jingmut ha Lapangap kam dei kaba dang shen hynrei ka dei kaba la jia la bun bun sien bad kam don jingïadei ei ei ruh bad ka kam ïa pynbeit pud namar ka Lapangap ka hap hapoh u pud u sam ka Meghalaya.
U la ong ba ka sorkar MDA ka la shim khia bad buh hakhmat eh ïa kane ka kam ïa pynbeit pud bad ka Assam bad na ki 12 tylli ki jaka ba don hapdeng ka jingïakajia mynta hynriew tylli la dep pynbeit bad dang sah mynta sa hynriew tylli.
U la ïathuh halor ka Lapangap ha ka sien ba la dep ki nong Karbi Anglong ki la khang ïa ki nongrep na Lapangap ban leit ot kba hynrei hadien ba la ïa kren bad ïa pynbeit la ïoh ban leit ot pat ïa u kba. Ha kaba ïadei bad kane ka jingjia pat kaba mynta u la ong ka jingïakren hapdeng ki bor synshar District ka dang ïaid. Ki DC bad ki SP ki ïai ïakynduh bad ïakren ban pynbeit ïa kane ka jingïapher jingmut.
U ma Wailad u la ong ruh ka daw ka dei ruh ba ki bor ka Karbi Anglong District Council ki ïai kylla ktien na ka por sha ka por. Hadien ba la dep ïakren ia pynbeit tang hapdeng lai saw kynta ki la kylla ktien biang bad ong ba kam lah ban long kumta dei na kata ka daw ba suki kane ka kam.
“Watla katta ruh ngi kyrmen ba ngin sa poi sha ka jingïasngewthuh jingmut baroh arliang mamla namar na ka liang ka jylla Meghalaya ka kwah ban poi sha ka jingïasngewthuh jingmut” ong u ma Wailad.
