Shillong, Jymmang 18: Ka National Food Security Act ka dei ka aiñ kaba pynthikna ban ym dei ban don mano mano ruh ne wat tang iwei ruh na ki nongshong shnong ki ban mad ïa ka jingkyrduh bam ne jingiap thngan, ong u Chairman jongka Meghalaya State Food Commission Bah DP Wahlang haba pyntip “La ai bor ïa ka Commission ban pynthikna ba ym dei ban don uwei ruh u briew hapoh ka jylla ban shah thngan”.
U Bah Wahlang ula pynpaw ïa kane haba kren ha ka jingïalang jongka ‘Regional Camp 2026’ kaba la pynlong ha Rongjeng, East Garo Hills District ha ka 15 tarik u Jymmang. ïa kane ka Camp la pynlong da ka Sub Division Office (Civil), Rongjeng Sub Division, ryngkat ka jingïatreilang bad ka Meghalaya State Food Commission, da ka jingthmu ban kyntiew ïa ka jingshngaiñ ha ka jingïoh ïa ka bam.
Haba ai jingkren, u Bah Wahlang ula “ban jur ïa ka bynta jong ka Meghalaya State Food Commission ha ka ban khmih ïa ka jingpyntreikam ïa ka Food Security Schemes ha ki tnad bapher bapher”.
Ula ong, ba kane ka kynthup ïa ka Tnad Food & Civil Supplies kaba pynïaid ïa ka Public Distribution System (PDS), ka tnad pule puthi kaba khmih ïa ka PM POSHAN scheme bad ka tnad Social Welfare Department kaba kitkhlieh ïa ki Anganwadi Centres.
“Ka kamram jong ka State Food Commission ka long ban pynthikna ba ym dei ban don mano mano ruh hapoh ka jylla kin mad ïa ka jingshah thngan ne ban ym ïoh ïa ka bam” la ong u Bah Wahlang.
Halor ka jingshim khia ïa ki jingeh, ula pynshlur ïa ki nongïoh jingmyntoi ba ki dei ban leit sha ka Meghalaya State Food Commission, lada ka jingeh ka jongki ka dei kaba ïadei bad ka Food Security Schemes ïa kaba ym shym la lah ban pynbeit ha ki kyrdan bapher bapher.
Ula pynthikna ba “Ka Commission ka la pynkhreh ïa ki sienjam ban tuklar bad ban pynthikna ba kino kino kiba ïoh jingmyntoi kim dei satia ban shah ieh khlem ka jingïoh ïa ka bam”.
Ha kane ka jingïalang la wan ban ïashim bynta da u Dr M Tyngkan dkhot jongka Commission, Deputy Commissioner, East Garo Hills District, ki heh ophisar sorkar bad u Bah IW Ingty uba long u Member Secretary.
Ki ophisar na ka tnad Social Welfare kila pyni ïa ka jingtreikam jongka ICDS, katba ka tnad pule puthi ka la ai jingbatai halor ka PM POSHAN.
Ka Dina Sangma, ADC jongka East Garo Hills District, ka la kren halor ka Public Distribution System, katba kiwei pat ki ophisar ki la kren halor ka Food Security Act, kum ka sienjam kaba kongsan ban ïai neh bad ban kynjoh ïa ka thong ba yn nym don mano mano ruh ban iap thngan.
ïa kane ka Regional Camp 2026 la pynlong hapoh jong ka mat “National Food Security Act, 2013.”
