Pynbna u MLA ka North Shillong ban ïakhun na kawei ka Party ym shuh na ka KHNAM ha u 2023

Shillong, Naitung 17: U Bah Adelbert Nongrum u MLA ba marwei jong ka KHNAM na North Shillong Constituency u la pynthikna ba un mih noh ïa na ka Khun Hynñiewtrep National Awakening Movement (KHNAM) ban ïakhun na kiwei pat ki seng saiñ pyrthei ha ka elekshon MLA ha u snem 2023.
Haba ïakren bad u Mawphor u Bah Adelbert u la ïathuh ba kane ka jingmih noh jong u ka long ka jingdawa jong ka kam ym namar ka jingkhwan bor bad ka jingwad jingmyntoi shimet.
“Wat la nga la don bynta naduh ba pun bad haduh ba kha ïa ka KHNAM, nga la jop ruh arsien sien kum u MDC ha u snem 2009 bad ha u snem 2014. Ha snem u 2013 wat la ngam shym la jop hynrei ka mynsiem ban ïakhun ka ïeng triang khlem kyrtiang dien, bad ha u Snem 2018 da ka jingieid, jingshaniah ki nongshong shnong ka constituency bad ka jingduwai ki ba bun nga la jop kum u MLA ka North Shillong, ” ong u Bah Adelbert.
U Bah Adelbert u la ong ruh, “Nga kwah ban pyntip ruh sha ka Constituency ba ha ka elekshon 2023 nga la pynkhreh ban ïaleh na kawei ka Party ym ba nga shet kylla ia ka KHNAM hynrei nga ngeit ba ki paidbah ki tip bha bad ki sngewthuh bha kaei ka daw namar ka jingdawa jong ka jinglong jong ki kam hapoh ka seng bad namar ka jingdawa jong ka kam ngan hap ban mih noh ban pynkhreh na kawei pat khlem da klet noh ki jingkular ba nga la khlei hakhmat ki nongshong shnong.”
Haba pyrshang ban kylli pat na ka party aiu un ïakhun ha u snem 2023 u Bah Adelbert u la ïathuh ba na ka liang jong u u long uba la kloi ban pynïasoh bad sha kino kino ki party kiba pdiang ïa u ryngkat ki nongrim kiba un hap rah lang.
“Nga pynthikna ba ngan don bad ka Party ka ba ngan ïoh ban rah lang bad ki nongrim ban bteng ban ïakhun ym namar ka jingkwah hynrei ka jingdonkam,” ong u Bah Adelbert.
Kumban shu kdew hangne, u Bah Adelbert Nongrum u la bat ruh kum u Chief Executive Member jong ka Khasi Hills Autonomous District Council (KHADC) hadien ba u Bah Ardent M Basaiawmoit u hiar shuki noh kum u CEM ha u snem 2014-15 ha ka por kaba ka All Regional Party Alliance (ARPA) ka bat ïa u lakam synshar ha KHADC.
Ki katto katne ki nong kyrshan jong u Bah Adelbert ki pynpaw ba kane ka jingmih noh jong u ka dei kaba um lah kiar bad ka jingbym don lad shuh jong u ban neh bad ka KHNAM namar ka kynrum kynram bad ka jingbym ïaid beit ka KHNAM kaba la poi haduh u pud ban ïakhun ha ïing bishar bad kumjuh ha khmat ka Election Comission of India bad ka jingbym lah pynbeit hapdeng jong ka kynhun u Bah Adelbert bad ka kynhun ba la ïalam da u Bah Pyndap Saibon ka dang khluit kat haduh mynta ruh.