Nongstoiñ, Jymmang 17: Ka jingsahteng jong ka jingïakren ki arliang sorkar ha kaba ïadei bad ka jingpynbeit ïa u pud u sam ka la pynlong ïa ki nongïalam jong ka Hill State People Democratic Party Youth Wing ba kin shimkhia bha halor katei ka mat. U samla Pynshai Joel Dkhar genral secretary ka HSPDP Youth Wing central body ha ka sngi thohdieng ba la dep haba ïakren bad u nongthohkhubor u la ong ba ha kine ki khyndiat sngi ban wan kin sa leit ban ïakynduh ïa u Conrad Kongal Sangma Myntri Rabah ka jylla ban pynsgew ha u ba un khot noh ïa ka jingïalang ban ïakren kumno biang kumno ban sdang ïa ka jingpynbeit ïa u pud u sam ha ka wat kaba ar khamtam eh ha kaba ïadei bad ka Langpih sector.
Ha kajuh ka por u la ong ba ka HSPDP kam kwah shuh ban ïohi ba ki jingïashrut, ki huri hura, bad ki jingïakynad ba bunjait kin dang ïai mih ha ka thaiñ Langpih hynrei ka kwah ba ka shongsuk shong saiñ bad ka jingïalong kawei kan don ha ka thaiñ.U samla Pynshai u la ong ruh ban a ka liang ka HSPDP ka kyntu jur ruh ïa ka sorkar lyngba ka tnad sam bording ba kan pynpoi bording noh shaduh ka shnong Mawdiangsnam namar ka jingpynpoi bording ha katei ka shnong ka la sdang naduh ki snem kiba mynshuwa hynrei ka la sahkut noh namar ka jing pynthut jong ki pulit Assam kiba don ha Langpih.
Ha kaba ïadei pat ba ka surok na Langpih haduh Ktiehthawïar u la ong ba ha naduh ba la dep shna bad siangrong ïa katei ka surok la shu ieh kumto bad mynta ka la jot rathai haduh ba ki kali ki la shem shitom ban ïaid. U la ong ruh ba ka jing jot jong katei ka surok ka la buh ïa ki paitbah nongshong shnong ka thaiñ namar ba baroh ki dei kiba im da ka rep ka riang bad ki kyrshan ïa ki long ïng long sem jong ki da kaba shalan ïa ki mar rep sha kiwei pat ki jaka.
Kumta ka jingsniew jong katei ka surok ka pynlong ïa ki nongñiah kali ba ki hap ban pynikiew dor ïa ka bai kit bai bah ïa ki mar rep. Ha kajuh ka por u la kyntu ïa ki bor pynïaid district ba kin shimkhia ban da wan peit ïa katei ka surok khnang ba kin lap ïa kajignshisha ba haduh katno ki paitbah ka thaiñ ki ïakynduh jingeh namar ka jingbym biang jong ka surok .
