Donkam ban pynim biang ki kam khaïi khappud hapdeng ka India bad Bangladesh: Conrad

Shillong, Jymmang 17: Ka ri India bad Bangladesh ki la sdang biang ka jingïakren ban bteng biang ïa ka jingïateh paralok, ïathuh u Myntri Rangbah ka jylla u Conrad Sangma, da kaba khot ban pynim biang ïa ka jingïadon bynta biang jong ki paidbah bad ki kam khaïi hapdeng kine ki artylli ki ri. U la ong ruh ba ka long kaba kongsan ban pynkynmaw ïa ki paidbah ïa ka jingïatreilang kaba la pynsah nam hapoh ka khana pateng hapdeng kine ki artylli ki ri ba kynthup ka jingai jingkyrshan jong ka ri India ïa ka ri Bangladesh ha ki por ba kane ka ri ka mad ïa ki jingeh.
U la khot ïa ka jingdonkam ban ïasam ïa ki kolshor bad ka jingdonkam ban plie biang ïa ki ïew khappud kiba la khang hadien ka huri kam pohïing jong ka ri Bangladesh ha u snem 2024.”Kane ka la wanjia shisha. Ka kam ka la sdang. Ki jingïakren ki la jia bad ki briew ki la ïakren bad ki la sdang ki kam ïasyllok,” ong u Sangma haba jubab ïa ki jingkylli ki jingïakren hapdeng kine ki artylli ki ri, ka India bad Bangladesh. ïa kane u la kren ruh haba ïadei bad ka jingthmu ban pynlong ïa ka North East India Infrastructure Summit and Exhibition, ka ban long ha Shillong ha ka 11 bad 12 tarik jong u bnai Jylliew.
“Nga ngeit skhem ba kane ka bynta ba mynta ba ka Bangladesh ka long kaba shipor, hynrei ha ki por ban wan ngi hap ban trei bad ka Bangladesh. Kane ka long kaba bha na ka bynta jong ngi bad kumjuh ruh ka Bangladesh bad nga ngeit ba kan don ka jingmyntoi bad ki kabu ba khraw halor kane,” ong u Myntri Rangbah.Ka jingkynthoh jong u Sangma ka la wan ha ka por ha kaba ka India bad Bangladesh ki dang wad ki lad ki lynti ban wanrah biang ïa ka jingshaniah lyngba ki lad ïatreilang bad ki jingïadei hadien ba ka jingïalong paralok jong ki, ka la sniew noh hadien ka jingshah pynhiar shuki jong ka Myntri Rangbahduh barim katei ka ri ka Sheikh Hasina bad ka jingwan ka jingkylla hapoh nongbah Dhaka.