Hap bishar ki paidbah ïa ki Myntri sorkar bad ki MLA ki bym sngewlem shuh ïa ki nong Lapangngap

Isynei ïa ki para ri lajong, haba ki dei ban wan tur sha Secretariat, na bynta ban ujor halor ka jingshah dkhat noh jong ka jakpoh jong ki bad nalor kata, haba ki wan tur ban pyni ïa ka jingsngew pyrshah halor ki kam thombor, hynrei ki shah kawang sa ka lyer (Pepper Spray) pynsatkhmat bad katei kaba pynlyngngoh, ba haba ki Myntri ka sorkar jylla, lane ki pulit, ki ïohi, ba ki wan da ka jingkutlad, ki la dei ban kdup ban kdun ïa ki, hynrei ki mad pynban, da ka jingshah leh ñiew beiñ hakhmat ka kmie jong ka synshar paidbah ha ka nongbah Shillong.
Ki don haduh hynñiew tylli ki jylla ba shatei lammihngi, hynrei ngim ju ïohi, ba kin ïa shut ha kane ka dur, kumba jia ha Lapangap bad lada dei ka Mizoram, ka Nagaland, ka Manipur, ka Arunachal bad kiwei kiwei, kiba don marpud bad ka Assam; hynrei khyllah sngi tang ha Lapangap jong ka Meghalaya, ha kaba tang la dei ka por leit rep ruh, la hap tur da ka jingïaleh, tang shu la dei ka por leit ot ruh, hap leit da ka jingïaleh bad kaei kane keiñ ka jingjia, kaba leit jia khyllah ïa ki para jong ngi, kiba don sha khappud jong ka Assam?
Ki nongïalam jong kane ka sorkar MDA, la ïohi, kumba kim pyrwa eiei ruh em bad na ki jingkren ha ki kotkhubor man u snem bad man ka por, ki la pyni, kumba ki shu kren kai, da kaba ki ju ong, ba ka don ka suk ka saiñ ha katei ka thaiñ bad katei ka jingkren, ka pyni, ba ki pynshlur ïa ka Assam, ba kan nang thom da ka jubor justi ïa ki nongrep bapli jong ka Lapangap.
Ka kamram jong ka sorkar jylla ka long ban ai jingïada ïa ki trai ri trai muluk, hynrei ha kaba ïadei bad kane ka sorkar MDA, la ïohi, ba ka khanglad ïa ki trai shnong bad ka pynshlur pynban ïa ki poiwir kiba na Karbi Anglong bad dei na kata ka daw, ba kam nud ban ai jingïada ïa ki, haba ki leit sha la ki jaka rep jaka riang bad kane ka dei ka jingkhaw eit kaba la jubor haduh katta lane ka jing ïa sylla ban die duh ïa ki jaka jong ki Pnar sha Assam.
Ka sorkar jylla, lada kam sngew thikna, ba kitei ki jaka rep ki dei ki jong ki nong Lapangap, ka la dei ban shu kren shai beit ïa ki, ba kin iehnoh ïa kitei ki jaka bad ba kin wan tur bad bam jem ki Khar Karbi ïa ki lyngkha ki risai kiba heh bah jong katei ka thaiñ lane lada ka jingmut jingpyrkhat jong ki, ka dei kaba shu kohnguh, katba ong ka Assam, kumta ki la dei ban kren shai, ba kim don bor eiei ban ïada ïa ki nongrep, haba ki leit sha kitei ki jaka.
Myntoi aïu shu pynïashoh ïa dat, shu ïa siat ïa pynïap bad na ka por sha ka por, ki paid Khasi Pnar, ki shah siat ïap beiñ, la kum ki sim khlaw ha ki kuli ba khlaiñ bor jong ki pulit Assam bad kata ruh kaba khlem don jingbishar eiei ruh em, kumba la jia ha Mukroh bad ha Langpih, ha ki khyndiat snem ba la dep.
Isangsot ruh ban ïohi ba bun na kito kiba sngewba ki ieid ïa kano kano ka kynhun seng saiñ pyrthei kaba don ha ka liang synshar kin hap ruh tang ban shu pynshong nongrim kiei mo ki kam babha ba ka la leh na ka bynta ka pateng jong ki khun ki kti ne ba kin shu hun beit tang ïa ka pisa pliah ba shu lute beaiñ da ki kam ba long beaiñ ne ba ki kwah ban ai da ka bih syndon ïa la ki jong ki khun ki kti ki ban sa im khlem ka jingshngaiñ bad u pud u sam ba skhem.
Haba ïohi ba ki don kiba shu ïaroh ïa ki kam kiba khlem da la ïohi ba kin long ki jingmyntoi jong ki pateng kiba dei ki khun ki kti, tang na ka daw ba ki la bam ïa ka mluh beaiñ jong kiwei, kan sa kyrtoh kylla lada ki khun ki kti jong ki, kin buh jingkylli pynban kaei kaba ki la leh katba dang don ha ka por ban ai ki lad jingïada, hynrei naba la shah tyllep ha ka spah ba dum ki klet noh ïa ka lawei ki khun ki kti la jong.
Haba phai sha u pud u sam lada dei sha Jaiñtia Hills, sha Ri Bhoi District bad kumjuh ruh sha West Khasi Hills la jan baroh kidei ki jaka ba la don jingma kaba lah ban duh noh bad isangsot ïa kito ki paradoh parasnam kiba sah sha kine ki thaiñ naba ki shah leh beiñ, shah ieh beiñ ha la ka jong ka Sorkar bad dei halor kane ruh ba kim banse ban thom sha ka beaiñ ban don artylli ki EPIC card kawei sha Assam bad kawei pat sha Meghalaya naba tngan ka kpoh.
Kumba long bad jia pat ha Lapangngap kumno ka Sorkar jylla ka nud ban phah siat da ka pepper spray ïa ki paid nongshong shnong lajong haba ki wan ban pynsngew ïa la ki jong ki jingeh, bad hadien ba ki la ïoh ki jingkular na ka Sorkar kim pat ïoh satia ka lad ban leit sha ki jaka rep jong ki, kumta ki paidbah kin hap ban bishar bha ïa baroh ki kam kiba kane ka Sorkar hapoh ka jingïalam ka NPP bad kumjuh ruh ïa ki MLA Khasi Jaiñtia kiba long biang kohnguh bad long Myntri sorkar khlem sngewlem shuh ïa la ki paradoh parasnam lajong.