Dalade hiar u Myntri ban leit ai jingïarap ïa ka Borsing Syiem Children’s Home Mawsmai

Shillong, Jymmang 15 : U Myntri ka tnad Arts and Culture ka sorkar jylla ba dei ruh u MLA ka Shillong South Bah Sanbor Shullai hha ka sngi Thohdieng u la hiar hi dalade sha Mawsmai, Sohra ban leit ai jingïarap ïa ka Borsing Syiem Children’s Home kaba dei ka jaka ba ri bad sumar ïa ki khynnah ki bym don shuh ki nongri nongsumar.
Ha ka jingïalang ba lyngkot ha shwa ban aiti ïa ki jingïarap na ka liang u Bah Sanbor u la ïathuh ba ha ka sien ba u wan nyngkong ban wan jngoh ïa katei ka jaka sah kyrpang ha ka Republic Day u la buh jingmut ba sa shisien un hap ban wan biang ryngkat ki song jingïarap na la bynta ka Home. Na ka liang ka Children’s Home ha kane ka sngi la donlang naduh u Pastor R Bareh kumjuh ki nongri nongsumar ïa kine ki heprit
Katto katne na ki jingïarap ba u Bah Sanbor u aiti ha kane ka sngi ki kynthup naduh u khaw, ki phan, ki umphniang, ki jingbam tei met, ki jaka buh umdih kynthup ïa ki jain phong, ki jain kup syaid, jain siangthiah, ki flask bad kiwei kiwei sha baroh 26 ngut ki khynnah kynthei bad shynrang kiba sah hangtei.
U Bah Sanbor u la aiti lang ruh ïa ki jingai sngewbha ïa u Pastor kumjuh ïa ki nongri bad nongpeit jong ki heprit.
Shwa kane, u Pastor Bareh u la ïathuh ba ka Home ka don 19 ngut ki heprit kynthei bad 7 ngut ki heprit shynrang. Ha kajuh ka por u pynpaw ka jingkmen bad ong ba dei tang u Bah Sanbor uba la poi arsien ban wan jngoh ryngkat ki song jingïarap kata ruh tang hapoh khyndiat bnai.
“Ka jingdon jongphi kum ki nongmihkhmat bad kum Myntri Sorkar ka long ka jingseisoh bad ka jingmyntoi na ka bynta ki kam pynroi ha ka jylla,” u la ong da kaba bynta ba kum ka Home baroh kawei ki pynpaw ka jingsngewnguh kaba khraw halor ki jingïarap ba ki ïoh pdiang.
Hadien kane u Pastor u la aiti ruh ïa ka dorkhas ha u Myntri ban pynwad lad lem na ka sorkar na ka bynta ban shna ïa ka Hall kaba kham heh ha katei ka jaka.
“Lada ngi don ka hall kaba kham heh ngi lah ban ai ki jinghikai ne ki skill training na bynta ki khun kiba la pasa Matrik ne dap 18 snem khnang ba kin lah pat ban ïeng hala ki jong ki kjat ynda ki la mih nangne,” u la ong.
Halor kane ka dorkhas u Bah Sanbor u la kular ba un pyrshang borbah bad kyrpad ïa u Myntri Rangbah khnang ba kin lah ban pynurlong ïa kane.
“Nga ai ka jingïaroh bad ka burom ïa ki nongseng ïa kane ka Children’s Home namar lada ym don kane shaei kine kin leit bad mano ban ri ïa ki,” u la ong.
U Bah Sanbor ha ryngkat u Bah Wallam Khongwir ki la kular ruh ba na ka liang ka komiti jong ki kin bteng ban pynpoi ïa ki lad jingïarap sha katei ka Home na ka por sha ka por.