Da ka jinghikai pynsngewthuh paidbah halor ka khuid ka suba la pynlong ha Amlarem

Amlarem, Jymmang 15: Shi bynta naka jingrakhe ïa ka Jubili Ksiar jong ka Amlarem Sub-Division mynta ka sngi 15 tarik u Jymmang la pynlong ïa ka prokram ai jinghikai sha ki paidbah ha ïew Amlarem halor ka khuid ka suba ne ka ‘Waste management under the “Clean Amlarem Campaign” bala khot pynlong da katei hi ka ophis.
Ha kane ka sngi la ai jingkren naduh u Waheh Shnong Amlarem uba dei ruh u Secretary ka Synjuk Ki Waheh Shnong, War Jaiñtia ma Kampher Pohlong uba la ban jur halor ka jingdonkam jong ka khuid ka suba hapoh ka thaiñ Amlarem, ha ryngkat ka jingkyrshan lang ka ophis SDO, BDO, ki seng bapher bapher bad ki nongshong shnong ka thaiñ.
Ula kyntu ïa ki nongshong shnong ba kin tip kumno ban pynïakhlad ïa ki jaboh ha ki ïing ki sem bad kumjuh ha ki jaka ïew, da kaba pynsngew dang ha kine ki sngi bala dep ïa ki nongshnong shnong ka Amlarem la leit ïalam sha ka jaka pynkhuid bad bret jaboh ha Marten Shillong ha kaba la ïoh jingtip shibun halor ka rukom pyniakhlad ïa ki jaboh katkum ka juk (science) bad ban pynkhuid ïa ki jaboh jabaiñ bad pyndonkam biang haka liang ki sboh.
Ula kyrpad ïa ki nongshong shnong ba kim dei ban bret pathar ïa ki bilor namar ka buh jingma ïa ki nongtrei kiba trei ïa ki kam pynkhuid. Ula maham ruh ban nym bret pathar ïaki jaboh bad lada lap ki lah ban shah pynshitom.
U Block Development Officer jong ka Amlarem C&RD Block, Dr. D. Lyngdoh ha ka jingkren ula pynsngew kane ka prokram ka long shi bynta na ka “Clean Amlarem Campaign”, ula pyntip ba shen yn sa pynlong ïa ka jingleit jurip ïa ki ïew ki hat, ki jaka sah bad ki jaka treikam ban bishar bniah ïa ka jingbun ki jaboh kiba mih man ka sngi bad ban thaw ïa ki lad ki lynti kiba biang ban pynïaid ïa ki.
Kiwei de kiba ai jingkren halor ka khuid ka suba ki long u Advisor ka Synjuk Ki Rangbah Shnong War Jaiñtia u ma Kolmen Pohshna, ka Secretary ka Seng Kynthei Amlarem kong Melimon Surong nalor kiwei de. Lyngba kane ka prokram kan ai jingïarap shibun eh ia ki nongshong shnong ba kin tip kumno ban pynkhuid ïa ki jaboh jabaiñ hapoh ka thaiñ Amlarem.