Khliehriat, jymmang 15: U Deputy Commissioner-cum-Principal Census Officer, East Jaiñtia Hills District u pynbna paidbah ïa ka House Listing Operation (HLO) kaba na ka bynta ka khanasamari kaba jong u snem 2027 ba kan sdang ha East Jaiñtia Hills District naduh ka 16 tarik mynta u bnai jymmang haduh ka 14 tarik u bnai naitung 2026.
U pynbna ruh ïa ka Self Enumeration ka jingbatai kaba da lade hi kaba dei lyngba ka HLO App kaba la plie naduh ka miet jong ka 15 tarik u bnai jymmang.
Na ka liang u Deputy Commissioner-cum-Principal Census Officer u kyntu bad kyrpad ïa baroh ki nongialam shnong ba kin pynbna paidbah ïa kane ka House Listing Operation ba ki trai iing kiba ha shnong ha thaw kin tip ban batai shai ha ki Enumerators/Supervisors kiba wan ha ïing bad kane ka dei kawei na ka jingiatreilang bad ka tnat ba pyniaid ïa ka khanasamari hapoh ka district.
La bthah ruh bad baroh ki long ïing ki dei ban long kiba la pynkhreh lypa ban jubab ïa ki jingkylli kiba donkam lada wan kiba shim kyrteng lane ki Enumerators.
Kum ka jingai jingmut la ong ruh ba baroh ki nongshong shnong ba kin don ha ïing ha ka por ba leh ïa kane ka House Listing Operation bad kito ki nongshong shnong kiba la dep leh lyngba ka Self Enumeration kaba lyngba ka HLO App la kyntu ïa ki ba ki dei ban buh bha ïa u number Self Enumeration (SE-Number) uba ki la ioh na ka app ha kaba yn lah ban pynshisha pat da ki Enumerators.
Na ka bynta kito kiba na kiwei pat ki shnong ki dei ban jied bad iathuh ïa ka shnong trai ha ki enumerator/ Supervisor khnang ban lait na ka jingbakla.
La kyntu ruh ïa ki nongshong shnong ba kim dei ban pynsaphriang ïa kino kino ki khana hamsaia bad kim dei ruh ban don kano kano ka jingngeit biej ha kaba ïadei bad ka khanasamari 2027, la kyntu ruh ba kim dei ban buhrieh ïa kano kano haba kylli ki Enumerator namar ioh kan ktah ïa ka jingthmu ka sorkar ha kaba ïadei bad ka roi ka par, la kyntu ruh ba ki nongshong shnong kim dei ban don kano kano ka jingsngew tieng ban iathuh ha ki Enumerator haba ki wan ban leh ïa ka jingpunrung kyrteng khanasamari ha shnong ha thaw.
