Shillong, Jymmang 15 : Ka BJP ha Meghalaya ha ka sngi Thohdieng ka la pynlong ïa ka jingduwai sngewlem na ka bynta ki lai ngut ki nongïalam niam bad pastor kiba shah pynïap ha Manipur bad pynrem jur ruh halor kane ka kam thombor.
Ïa kane ka jingïalang sngewlem la pynlong hapoh ka jingïalam jong u President Rikman G Momin. Kine ki lai ngut ki Pastor kiba ngat ha kane ka jingjïa ki kynthup ïa u Rev. Vumthang Sitlhou, Rev. Kaigoulun Lhouvum bad Pastor Paogoulen Sitlhou.
Katba na ka liang u Nongaiktien rangbah ka party, Bah Mariahom Kharkrang u la kyntu ïa ki nongtrei ka party ban duwai man ka sngi na ka bynta kito kiba shah ktah ha kum kitei ki jingjia. U la kyrpad ïa uwei pa uwei u dkhot ka Meghalaya BJP ban pynlut por shi minit man ka sngi ban duwai na ka bynta ki paidbah ka Manipur kiba la mad bad dang ïai bteng ban mad ïa ki jingjynjar bym lah batai namar ka jingshah thombor.
Da kaba pynrem jur ia ka jingshah thombor, u Bah Kharkrang u la ong ba ïa kum kitei ki jingjia ki da pynrem jur bad ha ka rukom kaba tyngeh. U la kdew ruh ba kumno ka Meghalaya ka bteng ban long ka jaka ba shong suk shong sain bad kumta u kyntu ïa baroh ba ki dei ban bteng ban pynneh ïa ka suk ka sain la ka long kumno kumno ruh.
Ha kajuh ka por ka Kong Fenela Lyngdoh Nonglait pat ka la ong ba kine ki jingjia ba thombor ïa ka longbriew manbriew ka dei ka jingjia ba sngewsih ïa baroh ki nong India bad kumta ka ong ba ki duwai lang na ka bynta ka jingsuk bad ka jingwan phai noh ka jingshong shngain ha katei ka jylla.
