MSL 5: Da ka said jop ka Nongkseh ïa ka Rangdajied; liem ka Mawlai ha ka Lajong

Shillong, Jymmang 15: Ka Nongkseh SSCC ka la jop da ka said ïa ka Rangdajied United FC da 2-1 kol ha ka jingïakhun Super 8 jong ka Group A ha ka lympung 5th Meghalaya State League kaba la long hynne ka sngi Thohdieng ha madan MFA.
U Chesterpaul Lyngdoh (22’) bad u Aibiangmame Nongneng (90’+4) ki la pynkhihjar na ka bynta ka Nongkseh bad u Pasborlang Khonglikong (71’) u la pynïakhaid shipor ïa ka Rangdajied ha kane ka jingïalehkai.
Ka jingïalehkai kaba bud ka dei ka jingurlong biang jong ka phainal ka MSL 4, hapdeng ka Mawlai SC kaba bat ïa ka nam lahduh pyrshah ïa ka Shillong Lajong FC, hynrei mynta dei ka Lajong kaba la mih kum ka nongjop da 3-1 kol. Na ka bynta ka Lajong ïa ki kol la thep da u Deibormame Tongper (16’), u Riborlang L Lyngkhoi (34’) bad u Wilbert Marbaniang (86’) katba u Basuklang Bina (35’) u la thep na bynta ka Mawlai.
Haba phai sha ka jingïalehkai ba nyngkong, u Chesterpaul u la thep pynthikna ïa ka kol ha ka minit kaba 22 hynrei ka Nongkseh ka la pynsyrwa kai ïa kiwei pat ki kabu ha baroh kawei ka jingïakhun. Ha kawei pat ka liang, ka Rangdajied ka la ïoh ïa ka kabu kaba paka ban pynïakhaid shuwa ban jam sha ka por shongthait hadien ka jingbakla ki bak ka Nongkseh ka la plielad ïa u Dawanpynbiang Biam ban knieh ïa ka bol hynrei ka jingpyrshang jong u kam shym la long kaba thikna.
Ka RUFC, kaba la shah pynliem da 1-0 ha ka Lajong ar sngi mynshwa, ka la bteng ban tur shakhmat, bad u coach u Aiborlang Khongjee, u la bujli arngut ki rangïalehkai bad kane ka la nang ai bor khyndiat ïa ka kynhun tad haduh ba u Pasborlang un ïoh ban pynïakhaid ïa ka jingïalehkai.
Hynrei ka jingbym husiar bha jong ka Rangdajied ka la pynlong ïa ka Nongkseh ban ïoh bun tylli ki free-kick ha ka kylla miet katba ka dang pyrshang ban lamkhmat biang ïa ka jingïakhun. Bad dei lyngba kawei na kine ki khep kaba la pynurlong ïa ka jingangnud jong ka Nongkseh, ha kaba u Aibiangmame u la ïoh ban pynkhihjar ha ki minit pynjlan ba khatduh shuwa ban kut.
Ha ka jingïakhun kaba bud, ka Lajong ka la pynkhlaiñ ïa ka jingïalehkai jong ka naduh kaba sdang bad pynkhihjar ar sien ha ka kylla step. U Deibormame u la thep ïa kaba nyngkong da kaba shim kabu ïa ka jingbakla ki rangap dien ka Mawlai bad u Riborlang u la pynjlan ar shah ïa ka kol lamkhmat.
Tang hadien shi minit katei ka jingkheiñ ka la shah pynduna lyngba u Basuklang kaba la nang pynshongshit ïa ka jingïakhun. Kane ka dei tang ka kol kaba ar kaba ka Lajong ka la shah thep ha ka MSL 5.
Haba jam sha ka kylla miet, ka Mawlai ka la pyrshang katlah katïai ban pynïakhaid hynrei kam shym la lah satia ban pynurlong bad ka SLFC ka la pynskhem ïa ka jingjop da kaba thep ïa ka kol kaba lai lyngba u Wilbert.
Hadien ar kylla (round), ka Lajong ka lamkhmat ïa ka Group A da 6 poiñ, bud sa ka Nongkseh ha ka kyrdan ba ar da 4 poiñ, ka Mawlai 1 poiñ bad ka Rangdajied 0 poiñ. Ki ar tylli ki kynhun kiba wan ha khmat duh kin ïohrung sha ka semifinal hynrei ki dang don sa saw tylli ki jingïakhun na ka bynta ka Mawlai bad ka RUFC ban pyrshang wanphai.
Ki jingïalehkai kin wanphai biang sha SSA Stadium ha kane ka sngi Saitjaiñ ha kaba ki kynhun jong ka Group B kin ïa aireng markylliang. Hadien ba baroh ar tylli ki la shah rem ha ka jingïalehkai ba nyngkong ha ka sngi Palei, ka Maram FC bad ka Nangkiew Irat SC kin ïakhun pyrshah ha ka por 2 baje nohphai sngi, bud sa ka Rymbai Shkenshynriah SC pyrshah ïa ka Langsning FC ha ka por 6 baje janmiet.