Shillong, Jymmang 15: Ka Shillong Lajong FC ka la wanphai na ka shi kol ban pynliem ïa ka Rajasthan United FC da 4-2 kol ha ka wat ïakhun Championship Round jong ka lympung Indian Football League 2025-26 hynne ka janmiet sngi Thohdieng ha madan First Ground-SSA Stadium, Polo.
Ha ka jingïalehkai ka Rajasthan United ka la pynkhihjar nyngkong lyngba u Alan Thapa (21′) hynrei ka Lajong ka la ïohlad ban pynïakhaid lyngba u Gladdy Kharbuli (39′) shuwa ba u Everbrightson Mylliempdah (45’+1) un pynkhihjar ha ki minit pynjlan jong ka kylla step ban buh hakhmat ïa la ka jong ka kynhun.
Nangta u Gerard Artigas (59′) u la pynïakhaid biang ïa ka jingïalehkai ha ka kylla miet na ka bynta ka Rajasthan hynrei sa shi sien ka Lajong ka la lamkhmat biang lyngba ka kol jong u Phrangki Buam (71) kaba u la thep na ka penalty bad u Rudra Ved u la pynskhem ïa ka jingjop da kaba thep ïa ka kol kaba saw ha ka minit kaba 79.
Ka jingjop ka la pynneh pynsah ïa ka jingïakhun jong ka Lajong ban ïaknieh ïa ka nam lahduh da kaba kamai 25 poiñ naki 12 tylli ki jingïalehkai, watla ka jingkyrmen ka kham noh sha ka Diamond Harbour FC (28 poiñ) kaba donkam satang shi point ban pynskhem ïa ka nam lahduh.
Ka jingïakhun kaba dang sah jong ka SLFC kan long pyrshah ïa ka Diamond Harbour FC ha ka tarik ban sa pynbna. Ka DHFC ka lah ban pynskhem ïa ka nam lahduh jong kane ka samoi lada ka lah ban kiar na ka jingshah rem ha ka Dempo SC ha kane ka sngi U Blei.
Ki rangïalehkai ka Shillong Lajong kiba la mih madan pyrshah ïa ka Rajasthan:
Ranit Sarkar (GK) (sub Lakpa Lama 90’+6), Kitboklang Khyriem, Rudra Ved, Saveme Tariang, Kenstar Kharshong, Damaitphang Lyngdoh, Gladdy Kharbuli (sub Manbhakupar Iawphniaw 87′), Lamlallian (sub Maxderidoff Wahlang 90’+6), Figo Syndai (sub Tremiki Lamurong 62′), Everbrightson Mylliempdah (sub Abhay Gurung 87′), Phrangki Buam
