Ba ai pata jaka ka JHADC ïa ki briew shimet khlem ka jingtip ka Dorbar Shnong

Khliehriat jymmang 14: Ki paidbah nongshong shnong jong ka shnong Bataw, East Jaiñtia Hills District hapoh ka jingialam u Waheh Shnong, u bah Deihok Sumer, mynta ka sngi ki la ïa mih paidbah bad ïa lum lang ha kawei ka jaka kaba dang hap hapoh ka shnong Bataw bad ki la pynpaw ka jingsngew bitar ïa ka jingleh lyndet ka Jaiñtia Hills Autonomous District Council kaba la ai ïa ki kot jaka ne ki Land Holding Certificate sha ki briew shimet ïa ki jaka kiba dang hap hapoh ka jingpeit ka shnong Bataw bad ki nong shong shnong jong ka Bataw ki dang trei ïa ka rep ka riang ha katei ka jaka.
Haba kren sha ki pathai khubor, u Waheh Shnong Bataw, u bah Deihok Sumer u la ong ba “Hadien ba ka ophis jong u Deputy Commissioner ka East Jaiñtia Hills District u la pynmih ïa ka jingpynbna jong ka section-A na ka bynta ka jingshna ïa ka surok High Speed Corridor ne Four Lane, kum ka shnong ngi wan ha kane ka jaka dei namar ba ka mih ruh ka jingujor ha kaba ki don ki kot jaka (Land Holding) jong ki briew shimet, te kane ka jingai ne jing pyllait ïa ki Land Holding ka dei kaba khlem ka jingtip ka dorbar shnong Bataw bad khlem da phah ruh kano kano ka jingpyntip sha ka shnong bad kane ka jingleh ka long kum ka jingïuhroit ïa ka shnong bad ka paw ruh ba ka la don ka jingshim jubor ïa kane ka jaka jong ka shnong.
Na ka liang ka shnong ngi pyrshah jur ïa kane ka jingleh ka JHADC lyngba ki tnat ba dei leh ïa ki kot jaka, ngi pyrshah ruh ïa ka jingkam trai ïa kane ka jaka kaba dei ka jaka jong ka shnong ha kaba ki la ioh ïa ka Land Holding khlem jingtip ka shnong, kine ki jaka ba la kam trai ki dei ruh ki jaka ba ki nongshong shnong na Bataw ki ju rep, nga kwah ruh ban pynsngew ba lada phi kum ka JHADC phi shim ïa ka bor bad ïuhroit ïa ka dorbar shnong te na ka liang ka shnong ruh ngim banse ban shim da kiwei kiwei ki lad jingiakhih namar kane ka jingleh donbor ka paw ka jingïuhroit ïa ka shnong bad ngin nym sangeh ngim lum ïa ka dorbar shnong bad ngin shim rai kumno ngin leh nangne shakhmat bad kane ka jingleh ka JHADC lyngba ki tnat ba di peit lada kim lah ban pynduh pyndam ïa ki Land Holding ki bor shnong kin leit ujor sha ki bor ba shalor bad ujor ruh sha ka ïingbishar, nga kyntu ïa ka JHADC ba ka dei ban shim khia bha ïa kane khnang ban lait na kano kano ka jingia huri hura bad lada jia kano kano ka jingjia ba sngewsih ka JHADC ka dei ban shim ïa ka jingkitkhlieh”
Kumjuh ruh u Assistant Rangbah shnong Bataw, u bah Martin Lyngdoh, u la ong ba “Kawei kaba sngew phylla ïa ka rukom treikam ka District Council ha kaba ngi dang pyrkhat ba ka council ka dei ka ban iada ïa ka khyndew ka shyiap bad ïa ka hok ki briew bad pynshisha ïa ka jaka hynrei ynda ngi iohi ïa kaba kum kane ka jingleh torti ka council ka pynlong ïa ngi ban duh jingshaniah ïa ka council.
Kaba sngew phylla ruh ka long ba JHADC ka pynkloi ban ai ïa ki Land holding katba kiba bun ki briew kiba aplai land holding ka shim por sha ki bun taiew bad da ki bnai ban ioh hynrei imat dei na ka bynta ba don ka jingmyntoi na kane ka jingshna ia ka surok Fourlane lehse ka JHADC ka la pynkloi bha ban pynioh ïa ki kot ki sla bad kane ka jingleh jong ka EM Incharge jong ka District Council , ka kong Violet Lyngdoh kaba la pynkloi ban pynioh Land holding ïa ki briew shimet, kane ka jingleh lyndet ka JHADC ka pynsngewsih ïa ngi kum ka shnong u la ong.
La ong ruh ba, ka jingjurip na ka bynta ban shna ïa ka surok bah Speed Corridor ka la nag iaid shaid shaid bad ki la don ruh ki jaka kiba dang hap hapoh ka jingpeit ka shnong ba la leh ïa ka jingjurip hynrei kine ki jaka mynta ka JHADC ka la ai Land holding sha ki briew shimet.
La ong ruh ba na ka liang ki bor pyniaid shnong jong ka Bataw kin nym shong kli kti hynrei kin buddien beit ïa kane ka kam kaba la shu leh lyndet da ka JHADC lyngba ki tnat kiba dei peit ïa ki jaka puta.