Pynkut ka R Shkenshynriah ïa ka jingjop lynter jong ka Nangkiew Irat; Pynjemkhnap ka Langsning ïa ka Maram

Shillong, Jymmang 14: Ka jingjop kaba hynñiew sien lynter jong ka Nangkiew Irat SC ka la shah pynsangeh noh hadien ba ka la mad ïa ka nam rem da 1-2 kol ha ka Rymbai Shkenshynriah SC ha ka wat ïakhun Super 8 jong ka Group B ha ka lympung 5th Meghalaya State League hynne ka sngi Palei.
Kumjuh ha ka jingïalehkai kaba bud jong ka Group B, la sakhi ïa ka Langsning FC kaba la pynjemkhnap da 7-0 kol ïa ka Maram FC.
U Jefferson Pakyntein (39′) u la pynkhihjar nyngkong na ka bynta ka Nangkiew Irat hynrei ka Shkenshynriah ka la wanphai biang ha ka kylla miet da ar tylli ki kol ba la thep kawei hadien kawei tang hapoh 2 minit lyngba u Skilful Tariang (53′) bad u Hesmiki Rymbai (55′).
Ka jingbym ïa sngewthuh jingmut hapdeng u nongap kol ka Shkenshynriah bad u rangapdien ha khmat kol ka la plie lad ïa u Jefferson ban pynkhihjar hynrei kane ka kynhun na East Jaiñtia Hills kam shym la ailad ïa kane kan pynduh jingkyrmen ïa ki.
Tang mar ïa jam sha ka kylla miet ka jingïakhun ka la kylla bak ly bak, ha kaba ka Shkenshynriah ka la pynïakhaid lyngba u Skilful shuwa ba u Hesmiki un pynbud ïa ka kol kaba ar kaba dei artad ka namtam. Mynta u Hesmiki u la kynjoh 8 kol, kaba bun tam naki para nongïalehkai jong ka kynhun.
Ha kawei pat ka jingïakhun, ka Maram kam shym la don ka jubab pyrshah ïa ka Langsning, kiba la jop mynta 8 sien lynter ki jingïalehkai. Ka free kick jong u Dajiedlang Wanshnong ha ka minit kaba 32 kadei kaba nyngkong kaba la buh hakhmat ïa ka Langsning bad u Andy Joey Laloo (37′) u la thep da ka khlieh ban pynjlan ar shah ïa ka kol lamkhmat.
U Samuel Phawa (45’+1) u la ïoh ban thep ïa ka kol kaba nyngkong jong u ha kane ka sngi tang shuwa ban jam sha ka por shongthait bad bynrap ïa kaba ar (51′) tang katto katne por ba la sdang ïa ka kylla miet.
Nangta ka la dei ka pali jong u Nelson Rymbai, ha kaba une u nongthep kol ba bun tam jong ka MSL 5 u la nang kyntiew ïa ka jingkheiñ da kaba pynkhihjar ar sien ha ka minit kaba 54 bad 69 (kaba khatduh lyngba ka penalty). Mynta u la kynjoh 17 kol, kynthup ym duna ïa kawei na ki 8 tylli ki jingïalehkai jong ka Langsning.
U Dajiedlang (80’) u la bynrap sa kawei pat shuwa ban kut ka jingïalehkai ban nang pynkhraw ïa ka jingjop kaba paka jong ka kynhun.
Ha kane ka sngi Thohdieng baroh saw tylli ki kynhun jong ka Group A kin wanphai biang sha ka jingïakhun. Ha ka por 11 baje mynstep ka Rangdajied United FC kan aireng pyrshah ïa ka Nongkseh SSCC bad ïa kane yn bud sa ka jingïalehkai hapdeng ka lahduh ba bat ïa ka burom, kata ka Mawlai SC pyrshah ïa ka Shillong Lajong FC ha ka por 3 baje nohphai sngi. Baroh ar tylli ki jingïalehkai kin long hapoh MFA Ground.