Tang ki lad pathai khubor ba lah ban ïakhun ïa ki khubor lamler ha social media : Myntri ka IPR

Shillong, Jymmang 10 : U Myntri ka tnad Information and Public Relations ka sorkar Jylla, Bah Lahkmen Rymbui ha ka sngi Saitjain u la ong ba dei tang ki lad pathai khubor (Press) kiba lah ban ïakhun pyrshah ïa ki khubor thok bad ki khubor lamler kiba kynrei myta ha ki rynsan social media.
Haba kren ha ka jingïalang ban rakhe ïa ka World Press Freedom Day kaba la pynlong da ka Shillong Press Club bad ka Directorate of Information & Public Relations, u Myntri u la kyntu jur ruh ïa ki nongthoh khubor ka jylla ba ki dei ban thoh beit ïa ka jingshisha bad ïakhun pyrshah ïa ki khubor thok khubor lamler kiba jur ha social media.
U Myntri u la ong ruh ba u sngewkmen ban ïohi ba ka don ka jingïadei hapdeng ki lad pathai khubor ka jylla bad ki tnad treikam jong ka sorkar la ka long bad ki bor pulit, ki bor ka ain bad wat bad ki khlieh nongsynshar ruh kumjuh.
Tangba u ong, hapdeng kine ki jingtreikam laitluid hynrei dang don pat kiba jingkhang ne ki jingbuh kyndon na ki katto katne ïa kaei kaba dei ban leh bad kaei ka bym dei ban leh.
Katkum ka jingong jong u, ka kamram jong ki lad pathai khubor ka la treikam radbah bha hadien ka khlam COVID.
“Naduh ka por jong ka khlam Covid-19 ngi la ïohi ïa ka bor jong ki lad pathai khubor hynrei ka la nang shah ktah pat katba nang jur ki bor social media. “Kumta ka eh bha ïa ki paidbah ban bishar kano kaba dei bad kano pat kaba lait,” u la ong.
Shuh shuh u ong ba lada kwah ban ïohi ïa ka imlang sahlang kaba khih bad kaba laitluid, donkam ïa ki lad pathai khubor ban thoh kumba ka dei ka jingshisha. “Hynrei lada phi kwah ban pynkyllaiñ ïa ka jingshisha, hangta kan sa mih ka jingeh,” u la bynrap biang.
U Myntri u la ogn ruh ba lada thoh ïa ka jingshisha, man ki bor sorkar, ki agency bad kumjuh ki tnad sorkar kin pdiang sngewbha ïa ka namar ki tip ba ki lad pathai khubor ki dei ki rishot ba saw ha ka imlang sahlang. “Kadei ka kamram jong ki ban ai ïa ki jingtip kiba shisha bad kiba dei sha ki paidbah,” u la ong.
Ha kajuh ka por u ong ruh mynta ki paidbah kim peit shuh ïa ka khubor hynrei ki peit tang ïa ki khlieh jong ki khubor (heading) watla ka khubor ka dei kaba sngewtynnad katno katno ruh. “Ka heading ka dei kaba kham kongsan bha. Lada phi peit ïa ki heading mynta kam don jingïadei satia bad ka khubor kaba don hapoh. Bun ha ki social media ki ai tang ki heading khlem ka pasoh,” u la bynrap biang.
Khatduh u la ong ba mynta ki donkam ïa ki lad pathai khubor ba kin ai beit ia ka jingshisha kaba dei, lym kumta ki kotkhubor ki lah ban shah knieh noh ha ka social media lane kiwei kiwei ki bor ka juk mynta.
Ha kajuh k apor u Director ka DIPR, Bah Batlang S Sohliya u la ong ba ka jinglaitluid jong ki lad pathai khubor ka donlang bad ka jingkitkhlieh ha kaba ki dei ban kiar katba lah na kaba pynheh jubor ïa ki khubor tang namar ban bun ki nongpule. U banjur ruh ba ka long kaba donkam bha ban ïoh na baroh ki liang haba thoh ïa kino kino ki khubor.