Nalor ka jingkynnoh kren heh bad kren tohmet ïa ki paidbah suba jur ka jingkhaïi tuh ïa ki tyndong lyer

Nongpoh, Jymmang 10: Wat hapdeng ka jingai mynsiem jong ka sorkar ba ka Gas shet jingshet ka biang haka jylla, katba ki paidbah ha kylleng ka dong Ri-Bhoi ki mad ka jingkyrduh Gas kaba khraw ban shet jingshet, ba bun ki hap ban ap bun bnai ban ioh kawei ka tyndong gas.
Halor kane ka jingeh bad ka jingkyrduh Gas nalor ka jingkynnoh kren heh bad kren tohmet shaba palat da ka trai jong ka Wankhar Gas Agency kaba shu sam gas sha ki paidbah haka thaiñ Byrnihat, ki paidbah ka thaiñ Byrnihat ryngkat ki nongïalam ka RBYF Byrnihat Circle hapoh ka jingïalam u Samla Ricky Lapang President, mynta ka sngi kila tur sha ophis treikam ka Wankhar Gas Agency kaba don ha Byrnihat Proper.
Katto katne ki longkmie kila pynpaw ka jingsngewsih bad ka jingbitar kaba khraw halor ka jingleh bad ka jingkren tohmet ka trai jong ka Wankhar Gas Agency bala suba jur ruh ba ka jingkyrduh gas ka dei ka jingdon ka jingkhaii beaiñ bad die tuh kaba shyrkhei haka dor kaba heh ha kaba ki paidbah kiba dei hok ban ioh kim shym la ioh kaba la pynlong ruh ïa kawei ka longkmie ban hap shet bad bad jhur ïaki khun da ka plastic ba kin ioh leit skul.
Kaba sngew lyngngoh ka long ba ka trai jong katei ka Gas Agency mar sien ioh jingtip ïaka jingwan tur ki paidbah kala phet krad na katei ka jaka ha kaba ki paidbah kim shym la ioh ban ïakren ban pan jingshai ha kaba ïadei bad katei ka jingkyrduh gas.
Haba kren sha ki lad pathai khubor naka liang u Samla Rikcy Lapang President ka RBYF Byrnihat Circle u la ong ba hadien ka jingujor kaba bun naki paidbah ka thaiñ Byrnihat, naka liang ka seng kala mih shakhmat ban kyrshan ïaki longkmie bad ki paidbah ki bym shym la ioh gas bun bun bnai katba ki don pat kiba sah wai ba tang ha ki khyndiat sngi kila ioh kaba la pynlyngnoh shikatdei ïaki paidbah bad naka liang ka seng ka pyrshah jur halor ka jingsuba ba ka lah ban don ka jingdie tuh kaba shyrkhei ïaki tyndong gas haka dor kaba rem bad rai ban ujor sha ki bor bahalor.