Shillong, Jymmang 10: Ka Hanuman Mandir kaba don ha Garikhana, ha ka por dang step phyrngap jong ka sngi Thohdieng kala shah tuh, kaba don hapoh jong ka Lumdiengjri Police Station, Shillong.
Haba ïa kren bad u Superitendent of Police (SP) ka East Khasi Hills District u Bah Vivek Syiem u la pyntikna ïa kane ka jingjia bad kumjuh ruh ïa ka sngi ba jia.
Katkum ka ejahar ba la ujor sha ki pulit da ki briew kiba peit ïa kane ka Temple, ki riew runar bym lah ban tip kidei kiei ki la rung tuh shapoh ka jaka jong ka temple hadien ba ki la pynjulor ïa kawei ka jingkhang ba shadien bad ki la tuh ïa ki bleithaw, ki jingdeng, ki tiar leh niam bad ka pisa na ka synduk ba ïa noh synniang ki briew.
Ha ka ejahar la pynpaw ruh ba ki CCTV ba la buh hapoh bad shabar ka temple ki la shah pynjulor.Hynrei la ïathuh ba ki dur khih na kawei ka iing kaba don hajan ki la ioh ring ia ka jingleit jingwan jong ki suba donkti kiba mih na katei ka jaka.
Hadien kane ka jingjia ka Central Puja Committee (CPC) Meghalaya ka la pynrem jur ïa kane ka jingshah tuh bad dawa ban leh eiei mardor ïa kiba donkti.
U president ka CPC Meghalaya u N. Bhattacharjee u la kyntu ïa ki bor synshar district bad ki bor pulit ban pynlong ïa ka jingtohkit kaba bniah, ban kem kloi ïa ki nongleh kam sniew bad ban pynthikna ban leh da kaba tyngeh katkum ka aiñ.
