Naduh ba khang dewïong bad sangeh khaïi sha ri Bangladesh

Shillong, Jymmang 09 : U Symbud Myntri Rangbah ka Jylla ba peit ïa ka tnad Transport, Bah Sniawbhalang Dhar u la ong ba ka sorkar jylla ka dang bishar bniah ïa ka jingkyrpad jong ki nongniah trok na Jaintia Hills ban weng noh ïa ki jingshah dain kuna bad ka bai kot kai bad bteng ïa ka jingkyrshan katkum ki kyndon ka ain lada ka don ka lynti.
Ïa kane la ïathuh hi da u Symbud Myntri Rangbah hadien ka jingkynduh ïa ka Joint Action Committee kaba kynthup naduh ka East Jaintia Hills Truck Owners & Transporters Association bad kumjuh ka Jaintia Hills Truck Owners Association.
“Na ka liang ka JAC ki la kyrpad ïanga ban map noh katto katne ka jingsiew – kum ka bai kot kali bad kiwei kiwei,” ong u Symbud Myntri Rangbah. Shuh shuh u la ïathuh ba ki don bun na kine watla ki ju siew tikna man ka por da ki snem hynrei mynta pat ki la ngat ha ka kuna kaba heh bha.
“Ki la pynpaw ba ha kine ki khyndiat snem ba la dep ka kamai kajih jong ki kam da long shuh na ka daw ka jingkhang dewïong bad kumjuh hadien ba ka khaii sha Bangladesh ruh la sangeh. Kumta ki la kyrpad ïanga ban map noh khyndiat ka khajna lada shah ka lynti,” ong u Symbud Myntri Rangbah.
Haba jubab halor kane, u Bah Sniawbhalang u la ong ba kane ka kam ka dang don ha ka jingbishar bniah jong ka sorkar. “Nga dang don ha ka jingpynkhreh ban peit ïa kane ka kam bad ban eksamin ïa ka, nga tharai ngin ïarap ïa ki ha ki katto katne ki kyrdan”, u la ong. U la pynshai ba tang ki khajna ha ka kyrdan jong ka Jylla lah ban pyrkhat ban pynlait. “Nyngkong eh ngi hap ban peit bniah ha kano ka bynta ba ngi lah ban weng. Hynrei haba ïadei pat bad ka Central Motor Vehicles Act kane ka dei ka kam ka bym lah ban long,” u la ong.
Shuh shuh u la ïathuh ba ïa kane ka jingtyrwa yn sa buh hakhmat ka kynhun myntri. “Ngam pat rai haduh katno percent ngin map. Nyngkong nga hap ban pynkhreh ïa ka jingtyrwa halor kaei kaba lah ban long bad ban wanrah sha ka kynhun myntri ban ïoh ïa ka jingmynjur,” u la ong.
“Khlem artatien ngin ïarap ïa ki katkum ka ain. Ngam lah ban ong ba ngan pyllait lut, bad ngam lah ruh ban ong ba ngam lah ban ïarap satia. Kiba ïadei bad ki khajna jong ka jylla, ngi don ha ka jingïatreilang bad ka Taxes bad Revenue Department ban ïarap katba lah,” u la bynrap biang.
Lah ban kdew hangne ba ha ka dorkhar na ka liang ka JAC ka la kyntu ïa ka sorkar jylla ban pyntreikam biang ïa ka skhim “Special One-Time Settlement” ban ïarap ïa ki nongkhaii ban pynbeit ryntih ïa ki kot ki sla kiba shah ktah na ka jingsiew bai lutksan bad bai lutksan kiba la sahteng slem.
Ha kane ka sngi ka JAC ka la ong ba kane ka jingwanrah ka long halor ka jingeh kaba bun kaba ki trai trok ha ka thain.
“Namar ka jingnang bun ka khajna bad ki bai lutksan kiba ïadei bad kane ha ki snem kiba la leit noh, bun ki trai kali ki shem ba kam long kaba lah ha ka liang ka pisa tyngka ban pynthymmai ïa ki kot ki sla jong ki kali hapoh ki jinglong jingman kiba mynta. Kane ka la pynlong ïa bun ki kali heh ban ym ïoh pynthymmai shuh ïa ki kot kali kaba la ktah kylla pat ia ka kamai kajih jong ki,” la ong ka kyrwoh.