“Heinuton, dekhadi kaar baar, jonmero prothomo shubhok shon” – Konuton, pyni ïalade sa shisien, ha ka khyllipmat babha ba nyngkong jong ka jingkha.
U Gurudev Rabindranath Tagore u la thoh ïa kine ki kyntien kum ka jingkyrpad- ka jingduwai ïa ka mynsiem kaba pynthymmai man ka por jong ka Bengal. La jur wai ïa ka ha ka sngi kha jong u, ban burom ïa u bad na ka bynta ka jingkmen jong ka jingpynthymmai, ka jingpynkylla kaba ka sngi kha ka long kum ka dak. U Gurudev u sngewthuh ba kane ka ri kam shu kylla. Ka long kaba la kha pat man ka por.
Ka long kaba sngewkmen ba ym pat dap shi taïew shwa ka jingrakhe lyngkhuh sngi kha kaba 165 jong u Gurudev Rabindranath Tagore, ka West Bengal ka la sakhi ïa ka jingkylla kaba khraw ha ka histori. Ha ka 4 tarik u Jymmang, ka Bharatiya Janata Party (BJP) ka la ïoh ïa ka jingjop kaba khraw ha ka elekshon sha ka ïing dorbar thaw aiñ jong ka West Bengal. Hynrei na ka bynta ka BJP bad u Myntri Rangbahduh ka ri u Narendra Modi, kane ka elekshon kam shym la long satia tang ka jingïakhun saiñ hima sima. Ka la long ka lad ban pynphai biang ïa ka burom kaba la jah jong kane ka jaka kaba khraw, ka jingkhot jong ka riti dustur kaba palat ïa ki jingpyrkhat shaphang ki elekshon.
Mynta ka sngi, ka long kaba donkam ban sangeh shipor, ban buh sharud ïa ka jingsawa jong ki jingïakren saiñ pyrthei ban kylli ïa ka jingkylli kaba kham jylliew: kaei ka Bengal, shisha? Bad kaei ka jingmut ban pynphai biang ïa ka? Ban sngewthuh ïa ka por ba mynta jong ka Bengal, dei ban peit nyngkong sha ka mynnor jong ka – ym sha ka mynnor jong ki phew snem, hynrei jong ki spah snem.
Shuwa ba ka Bengal kan kylla long ka nuksa jong ka jingpynbha ïa ka jingmut jingpyrkhat, ka la long ka jaka kaba kyntang. Ha ka spah snem kaba 15, harud jong ka wah Ganga ha Nabadwip, uwei u samla uba kyrteng u Nimai-uba ka pyrthei kan sa tip kum u Chaitanya Mahaprabhu – u la sdang ban rwai. Ka kirtan jong u kam dei tang ka jingrwai. Ka la long ka jingïakhih ban pynkylla ïa ka imlang sahlang kaba don ryngkat bad ka jingngeit. U la kdup ïa ki bym lah ban ktah, u la shad bad u riewstad, bad u la pynbna ba ka kyrteng jong ka jinglong blei ka long kaba baroh ki lah ban ïoh khlem ka jingkit jong kino kino ki jinglong. Ka niam Vaishnav kaba u la pynkhlaiñ ka la kylla long ka jingtei ba kynja mynsiem jong ka Bengal bad ka Bharat: kaba kmen bad kaba kynthup lang.
Arspah snem hadien kane, kata kajuh ka mynsiem ka la shem ïa ka jingïahap lyngba ka dustur Baul – ki riewkhuid kiba shang shane shato ki bym kheiñ ïa ka caste, ki bym don kano kano ka jingthoh kaba ïadei bad ka niam, bad kiba rwai ïa ka “manermanush,” u briew uba khlaiñ ka jingngeit. Napdeng jong ki, ym don uba shai kham shai ban ïa u Lalan Fakir, u briew uba ym don niam bad uba man la ka dustur ka pdiang. U Hindu ne u Muslim? Ym don ba lah ban ong, bad ym da donkam hi ban leh ïa kane. Kane ka jingstad ka long ka Bengali, ka jinglong kaba hap ban mad ban sngewthuh.
Ha ki laispah snem ba la dep, ka Bengal kam shym la shu ïashim bynta tang ha ka jingkhie im biang ka jingsngewlem jong ka India – ka la long kum u rishod jong kane. U Raja Rammohan Roy u la peit ïa ka imlang sahlang kaba la nangeh ha kaba ïadei bad ki riti dustur jong ka bad u la jied ban ym iehnoh ïa ka riti dustur lane ban aiti matlah ha ka. U la pynkylla dur ïa ka – da kaba ïaleh ban pynduh ïa ka sati bad da kaba pyrshang ban peit ïalade ban pynthymmai ïalade. U Ishwar Chandra Vidyasagar u la rah ïa kata ka kam shakhmat, u la pynkylla ïa ka jingpule sha ka kam ban pyllait luid, khamtam ïa ki kynthei.
U Bankim Chandra Chattopadhyay u la ai sha ka ri ïa ka novel ba khraw ba nyngkong jong ka, kaba kynthup ïa ka Vande Mataram, ka jingpyrta thma ka ban sawa na ka shyntur jong ki nongïakhun na ka bynta ka jinglaitluid haduh shispah snem bad ka dang ïai bteng ha ka shyntur jong uwei pa uwei u nong India haduh mynta. Ka Bengal ka la ai ruh ïa ka ri India ïa ka doktor kynthei ba nyngkong eh jong ka, ka Dr Kadambini Ganguly, kaba la ai mynsiem ïa ki kynthei ban shaniah halade bad ka jinglaitluid. U Dr Syama Prasad Mukherjee, u riew ieit ri uba shitrhem, u la aiti ïa la ka jingim na ka bynta ka jingïatylli jong ka ri India.
Lehse napdeng baroh ki briew ba phylla bad ki mynsiem bakhraw ba ka Bengal ka la ai ïa ngi, u Swami Vivekananda u ïeng kum u briew uba tyngshaiñ, shemphang bad uba don ki jingmut jingpyrkhat kiba khraw. U Swami Vivekananda, ha ka jingkren ba pawnam jong u ha ka World’s Parliament of Religions ha u snem 1893, u la pyni sha ka pyrthei ïa ka jingkhraw jong ka niam Hindu bad u la kyntu ban don ka jingburom ïa baroh ki niam bad ban pynkutnoh ïa ka jingieid niam khlem pud. Hynrei ynda u la wan phai sha la ïing, u la ïathuh ha la ki jong ki briew ïa kaei kaei kaba kham eh ban ïohsngew – ba ka jinglong mynsiem khlem ka bor ka long ka jingsngew, ba ïa u briew uba thngan ym lah ban hikai ïa ka philosophy, ba ïa ka blei dei ban mane ym tang ha ka ki jaka mane hynrei da kaba mane ïa ki kynthei, ïa ki baduk, ha ka ri.
Kane kadei ka jinglong jong ka Bengal. Ka la ju long beit kumne. Bad kumne u Myntri Rangbahduh ka ri u Narendra Modi u ïohi ïa ka Bengal. Ym ban peit shadien ban long kaei kaei kaba ka la long; ba kan ym kylla long kano kano kawei pat ka ri nongwei, hynrei ban khmih lynti ban pynkhie biang ïa ka Bengal na ka jingïohthiah ha kaba ïadei bad ka imlang sahlang bad ban ïohi ïa ka bor kaba pura jong ka.
La slem bha mynta ba katto katne ki bynta jong ki riewstad jong ka Bengal ki la kheiñ ïa la ka jong ka pateng jong ka imlang sahlang kum ka jinglehraiñ – kaei kaei kaba dei ban ïaid lait, ban ai jingbatai, ne ban bujli da ki jingmut jingpyrkhat jong ki nongsynshar phareng. Ka jingmih ka long da ki phew snem jong ka roi ka par kaba suki, ka jingsahkut jong ki jaka treikam, bad ka jingpynsngap jar ïa kito kiba nud ban kren shaphang ka dharma, shaphang ka kolshor kaba khlem pyrshah hynrei kaba kyntiew ïa ka mynsiem ba bun bynta jong ka Bengal.
Ïa ka rai jong ka elekshon sha ka ïing dorbar thaw aiñ kaba dang shen ha West Bengal ym dei ban peit tang kum ka rai elekshon. Ka pyni ïa ka sur paidbah pyrshah ïa kito kiba la pynjngai ïa ka Bengal na ki tynrai bad ki jinglong jong ka hi. Na ka bynta u myntri rangbah duh Narendra Modi, ka elekshon sha ka ïing dorbar thaw aiñ jong ka West Bengal kam shym la long satia ka jingïakhun ban ïoh ïa ka bor synshar. Ka la long ka jingpyrshang kaba kyntang – ka ‘yajna’ ban pynphai biang ïa ka burom kaba la duh.
Ka jingïadei kaba jan jong u Myntri Rangbahduh Modi bad ka Belur Math, ka jingburom jong u ïa u Swami Vivekananda, ka jingpynwandur jong u ïa ka jingsynshar babha kum ka seva – ka jingshakri kum ka rukom mane Blei – kine kim dei ki jingkren saiñ hima sima. Ki ai ïa ka Bengal ïa ka jingkyrmen ban ïoh biang ïa ka burom jong ka kaba la duh noh bad ban ïaid shakhmat sha ka lawei kaba donburom bad kaba shngaiñ. Ki long ka nuksa jong u ‘Pradhan Sevak’ uba pyndep ïa ka ‘Pradhan Dharma’ jong u.
Ban kyntiew biang ïa ka Bengal ka long ban tei ïa ki jingtei kiba bha tam ha ka pyrthei ha ryngkat bad ki ghat ha kaba u Chaitanya Mahaprabhu u la rwai. Ka long ban bei tyngka ïa ki skul kiba u Ishwar Chandra Vidyasagar u la thrang ban ïohi. Ka long ban tei ïa ki skulbah kiba pawnam ha ka ri kaba la ïalam ïa ka ri India ha ka pule puthi da ki spah snem. Ka long ban ai burom ïa baroh ki briew jong ka West Bengal. Ka long ban jubab ïa ki jingangnud jong ki briew jong ki jaka lum, kiba la mad slem ïa ka jingshah lehbeiñ ha ki kti jong ki seng ba la synshar ïa ka Bengal.
Konuton, pyni ïalade sa shisien, ha ka khyllipmat babha banyngkong jong ka jingkha. Kane ka dei ka jingduwai kaba ka sorkar BJP kaba nyngkong eh ha Bengal, hapoh ka jingïalam jong u Myntri Rangbahduh Modi bad ka jingkyrkhu jong uwei pa uwei u khun shynrang bad kynthei jong ka Bengal, kan pyndep ïa ka ‘seva’ jong kinangne shakhmat. Ha ki katto katne por, ha kine ki sanphew snem ba la dep, ka la long kumba ki sngi kiba bha tam jong ka Bengal ki la kut. Mynta, la kha pat ïa ka da ka jingkular jong ka jingim thymmai kaba shlur jong ka roi ka par bad jingsuk ka ban wan.
(U nongthoh u dei u Myntri Sorkar Pdeng ba dei khmih ia ka Tnat Kam Iada Ri).