Nongstoiñ, Jymmang 07: Ka jingpynsahkut jong ka sorkar ïa ka pisa na ka bynta ban pyntrei kam ïa ka skhim shi spah sngi kiba hap hapoh ki Block bapher bapher ha West Khasi Hills, ka la buh ïa ki paidbah ha ka jingeh khamtam eh ïa ki nongpynïaid ïa ki AEC bad ki VEC jong ki shnong bapher bapher.
Ha ka jingïakynduh jong u nongthoh khubor ïa ki nongpynïaid jong ki Village Employment Council jong ki katto katne ki shnong, ki la ong ba bun bah ka pisa kaba dei na ka bynta ban pyntreikam ha katei ka skhim, kam shym la poi thikna ym tip na kano ka daw. Don kiba pynpaw ba haduh mynta imat ha West Khasi Hills da ki phew klur ka pisa ka shu sahkut khlem ioh satia.
Uwei na ki nongpynïaid ïa ka skhim MNREGS ha kawei ka shnong ha Mawshynrut, u la ong ba u la pyrshang ban wad jingtip na kiwei kiwei ki Block hapoh West Khasi Hills kum ka Mawthadraishan bad ka Nongstoiñ Block, la lap ba ka don ka jingïapher kaba khraw ha ka jingpynpoi ïa ka pisa na ka bynta ban siew ïa ka bai trei bylla shi spah sngi.
Haba u la pyrshang ban wad jingtip na ka ophis jong ka Mawshynrut Block pat, la lap ba na ka liang ka sorkar kam shym la phah ïa ka pisa kumba phah ha kiwei pat ki Block.Kumta ka long kaei kaei kaba sngew lyngngoh bad pynsah umdum sha ki paidbah nongshong shnong.
Halor katei ka jingeh, kitei ki nongpynïaid jong ki VEC kiba pyntrei ïa ki projek bapher bapher, ki la ong ba ki don shibun ki jingtrei ki bym pat lah ban pyndep. Namar bun ki dukan ba ki ju leit shim tiar kum ki nar rod bad dew bilat ban pyntrei ïa ki footpath, ki pung tong um, ki jaka sait jaiñ bad kiwei kiwei, ki la shem jingeh ban kyrshan, namar ka jingbym lah ban siew ïa ka pisa bad kim don pisa shuh ban leit thied tiar kham bun.
Ki la ong ruh ba lada ka long kumba long mynta, ka jingpyntreikam ïa ka skhim shi spah sngi ha kylleng ki Block khamtam eh ki Block ba dang shu plie thymmai ka la dkoh. Kumta lada ka sorkar ka sngew dei, ka la dei ban phiah mar ryngkat ïa ka pisa sha baroh ki Block hapoh West Khasi Hills, khnang ba ki paidbah kin ym ïakynduh jingeh.
