Nongpoh, Jymmang 07: U wei u samla donsap haka kam dro jingdro naka them Ri-Bhoi, u ba la tip kyrteng kum u Khambiangbor Lyngdoh naka shnong Syngku, Ri-Bhoi District mynta marwei u la pyni nama bd pynpaw pyrthei ïaka jong ka sap jong u da kaba pynlong ïaka Solo Arts Exhibition ha ka mala ba ar jong ka Nongpoh Town Shopping Complex.
Ïa katei ka Solo Arts Exhibition la leit ban ai mynsiem bad plie paidbah da u Bah Mayral Born Syiem MLA ka Nongpoh mynta ka sngi haka jingdonlang ka Kong Balakyntiew Umbah President ka Ri-Bhoi Area Welfare Association (RAWA), kong Rida Lyndem PTI ka tnad Sports ka Ri-Bhoi District, ki khynnah skul lem bad ki bahaiing ha sem.
Kane ka jingpyni nam jong utei u samla ka long kaba kham kyrpang namar marwei u la sei madan ïala ka sap dro jingdro haka rukom kaba ni bad kaba janai bad kitei ki jingdro dur jong u ki don ruh ki khana ha man ki dur, ha kaba ïa kitei ki dur u die paidbah haka dor kaba bit.
Haba kren ha kane ka sngi u Samla Khambiangbor Lyngdoh u la ïathuh ba kane ka sap dro jingdro ka dei ka jingsngewtynnad bad ka sap jong u naduh dangrit ka rta ha kaba u la ioh ban leit shibynta ha kiba bun ki lympung bad khur ruh bun ki takma, bad hadien ba u la pyndep ïaka klas 12 u la ioh shuh shuh ban leit pyntbit ïaka sap bad pule ïaka Bachelor of Fine Arts ha Arunachal Pradesh bad hadien pat sha Tripura.
U samla Khambiangbor u la ainguh ïa u Blei halor ka jingïaid lynti jong u bad ka sap kaba u don ba u Blei um shym la iehnoh ïa u ban pynjanai ïaka sap bad kumta u la rai ban pynlong ïaka Solo Arts Exhibition ban pynpaw pyrthei ïaka sap kaba u don bad ai ka jingkhublei ba kyrpang ïa u Deputy Commissioner ka Ri-Bhoi District u ba la ailad ban pynlong ïa katei ka exhibition ha Nongpoh Town Shopping Complex bad kumjuh ruh ïa u MLA bad ki paralok najan bad najngai kiba la leit ban ai mynsiem ïa u.
Naka liang utei u samla la khot bad wer ïaki paidbah naduh ki khynnah, ki samla bad ki rangbah ban sakhi ban leit ai mynsiem bad kumjuh ruh ban thied ïa ki dur kiba u pynlut por ban dro shitom bad pynwan dur haka rukom kaba janai bad itynnad khamtam ki samla pule ba kane ka long ruh kum ka lad ban wad jingtip shaphang kane ka sap kaba u don.
