MSL 5: Wat hadien ba shah thep 2 kol wanphai ka A’chik SCO Rongjeng ban khur ïa ka jingjop

Shillong, Jymmang 07: Ka A’chik SCO Rongjeng ka la pynkut ïa ka jingïalehkai jong ka ha ka lympung 5th Meghalaya State League da kaba jop 3-2 kol pyrshah ïa ka Balmanduri FC ha ka Group G ha Williamnagar hynne ka sngi Palei.
Ha ka Group E kaba long ha Wahiajer, ka Iatyllilang Lumsehkot CSC ka la pynliem noh da 3-0 ïa ka Lamyrsiang SCC. Baroh ar tylli ki kynhun ki ladep thikna ban wan ha ka kyrdan ba lai bad ba saw ha ka Group shuwa kane ka jingïalehkai.
Kumjuh ruh ka ASCOR bad ka Balmanduri kim shym la lah ban jam shakhmat sha ka wat ïakhun kaba bud jong ka MSL 5 hynrei baroh arliang ki la aiti lut baroh ha madan ha ka jingïakhun hynne ka sngi.
Ka Balmanduri ka la khmihlynti ban khur ïa ka jingjop da kaba pynkhihjar ar sien ha ka kylla step lyngba u Chichang M Momin (27’, 33’) hynrei ka ASCOR ka la wanphai da kaba tyngeh ha ka kylla miet ban thep lai kol lyngba u kapten ka kynhun u Sensial Sangma (54′), u Klubarth M Sangma (78′) bad u Keri G Momin (88′).
Kumta da kane ka namjop, ka ASCOR ka la pynkut noh ïa ka bynta ha ka MSL 5 da kaba pyndep kyrdan ba lai ha ka Group G – hadien ba ka la jop saw sien bad rem saw sien na ki 8 tylli ki jingïalehkai group stage. U Keri u la long u nongïalehkai ba kongsan jong ka kynhun, da kaba thep 13 kol ha kane ka samoi.
Ha kawei pat ka liang, ka Balmanduri ka dang don sa kawei ka jingïalehkai ban ïakhun pyrshah ïa ka Janepih YSCA, kaba lamkhmat ïa ka Group.
Kin don ar tylli ki jingïalehkai ha kane ka sngi Thohdieng, baroh ar tylli kin sdang ha ka por 3 baje nohphai sngi. Ha ka Group E, ka Lumphyrnai Sohphoh FC kan ïakhun pyrshah ïa ka Shillong Lajong FC ha Wahiajer, katba ka Lawbah SC bad ka Mishon SSCC kin ïa aireng ha ka Group F ha Mairang.
Shuwa ban jam sha kane ka jingïakhun, ka Lajong bad ka Lumphyrnai ki la dep ban pynthikna ïa la ka jong ka jaka ha ka pre-quarterfinal, hynrei ka jingïakhun ha ka Group F ka lah ban wanrah jingkylla ïa ki kyrdan, ha kaba ka Lawbah ka donkam ban jop bun kol khnang ban knieh ïa ka kyrdan ba ar na ka Mishon.