SHILLONG, Jymmang 07: Ka SCA Academy bad ka St. Nanak Secondary School ki la jop ïa ki jingïakhun phainal ban pynskhem ïa ka nam lahduh hala ki jong ki kyrdan ha ka lympung ïalehkai kriket Inter School ba la pynïaid da ka Shillong Cricket Association ha MCA Ground, Polo.
Baroh ar tylli ki jingïakhun phainal la pynlong hynne ka sngi Palei (07 tarik Jymmang), ha kaba ka SCA Academy ka la pynliem noh ïa ka BK Bajoria da tang 1 wiket ha ka kyrdan ïalehkai Under 15, nangta ka St. Nanak Secondary School ka la jop da 17 ron pyrshah ïa ka KV Happy Valley ha ka phainal jong ka kyrdan Under 18.
Ha ka phainal jong ki U-15, ka BK Bajoria ka la jop ïa ka jingkynting pisa (toss) bad kam trai ban tied nyngkong, hynrei ka la ïohlad ban kamai tang 83 ron haduh kaba kut ki 20 ober bad khyllem 8 wiket. U Aryan Sunar u la long u nongtied ba kongsan tam, da kaba noh synñiang 40 ron naki 50 bol. Napdeng ki nongkawang bol jong ka sca Academy, u Ayush Kumar Roy u la khur 2/19 naki 4 ober, nangta u Devansh Deb u la khur 3/15 naki 4 ober.
Watla kadei ka thong kaba duna hynrei kam shym la long satia kaba suk ïa ka SCA Academy, kaba la khyllem 9 wiket ha ka jingpyrshang ban poi sha ka thong. Wat hapdeng ka jinghap ki wiket kane ka kynhun ka la lah pat ban kynjoh 84 ron haki 18.5 ober ban khur ïa ka jingjop.
U Devash Deb u la noh synñiang 14 ron naki 35 bol, bad na ka bynta ka jingïalehkai ba kyrpang ha baroh ki liang (khur 3 wiket ha ka boling) u la ïoh ruh ban khur ïa ka khusnam Player Of the Match.
Nangta ha ka phainal jong ka U-18, la sakhi ïa ka St. Nanak kaba la buh ïa ka thong kaba 124 ron bad khyllem 4 wiket haki 17 ober. La lamkhmat ïa ka tied da u Piyush Kumar Ray (51 ron naki 46 bol) bad u Ganesh Kumar (36 ron naki 36 bol).
Haba pyrshang jubab ka KV Happy Valley ka la lah ba kan kamai tang 107 ron bad khyllem 9 wiket haduh kaba kut ki 17 ober. U Adit Pradhan u la noh synñiang 40 ron naki 36 bol, katba u Imran Ali 29 ron naki 18 bol.
U Ganesh Kumar u la pynkut ïa ka jingïalehkai ryngkat ka jingkheiñ kaba 3/24 naki 4 ober bad u la khur syndon ïa ka khusnam Player of the Match.
