Shillong Jymmang 6: Ka seng Congress kam pat lah ban rai ïano kan pynïeng ne pynïakhun kum u ne ka kyrtong ha ka elekshon shiteng samoi jong ka MP Lok Sabha na Shillong Constituency, hadien ba u Secretary ka Meghalaya Pradesh Congress Committee (MPCC) u Bah Manuel Badwar ula kyntait ban ïakhun ha kane ka elekshon.
“Nga tharai nga lah dep ban kren da kaba shai kdar ha kaba ïadei bad ka seng Congress, ngim pat rai eiei, ngin sa shong noh shen ban lum ïa ka jingïalang. Hynrei ki jingai jingmut ki dei kiba la dep phah sha Delhi, ka AICC kan sa shim ïa ka rai kaba khatduh” la ong u Bah Badwar haba kylli halor ka rai jong ka seng Congress.
Ula ong, ba ka seng kam don bun ngut than ki kyrtong kiba pan tiket na ka bynta ka elekshon Lok Sabha. “Ngim da don than bun ngut ha kaba ïadei bad kane ka bynta, ngi don khyndiat ngut eh ki nongïalam bad kala ïaid ruh ka jingïakren ba u Bah Manuel Badwar un long uwei napdeng ki kyrtong uba don ïa ka jingthmu. Nga kwah ban kren shai kdar, ba ngam don satia ïa kano kano ka jingthmu ban long u kyrtong ban ïakhun ïa ka elekshon MP” la ong u Bah Badwar.
Haba batai halor katei ka rai, u Bah Badwar ula pynpaw ba udei u bym pat dei uba shemphang bha halor kane bad ka jingduna palat jong ka samoi jong kane ka elekshon shiteng samoi.
“Kaba nyngkong, ka jingshisha kaba suk bha, ba nga dei uba dang thymmai, ka jingshisha kaba suk bha ka dei ruh ba kan dei tang 2 snem jong ka samoi treikam, ka long ruh ka kam kaba eh ïano ïano ruh uba dang thymmai ban rung ha ka jylli jong ka Parliament bad ngin ym lah ban long ruh ki ban lah ban treikam bha kum kito kiba lah don lypa ban trei ïa katei ka kam”.
Ula bynrap “ïa nga shimet hi, nga ju ïai ong ïa ki paitbah, ba ka long kaba kongsan ban phah ïano ïano kiba la sngewthuh lypa ïïa ka jinglong jingman baroh jong ka Parliament bad ka rukom treikam ka jongka ha ka jaka ban phah da kino kino kiba dang thymmai namar ba tang 2 snem kin ym ïoh por than”.
