Leh burom ka KSU bad ki khynnah skul ïa ka lyngkhuh sngi ïap ba 187 snem u Syiem Tirot Sing ha Ri Bhoi

Nongpoh, Naitung 16: Kum ka jingkynmaw burom bad ka jingpyrto uwei na u riewshlur ka jaid bynriew Khasi hapoh ka bri u Hynñiewtrep, ka Khasi Student Union ha ryngkat ki bor pynid skul ka Skul Jawahar Novadaya Vidyalaya (JNV) School Niangbari, Ri Bhoi District mynta ka sngi ki la kynmaw burom ïa ka lyngkhuh sngi ïap ba 187 u Syiem Tirot Sing da kaba leit buh ki syntiew ki skut kum ka jingburom ha u mot ba la buh sah jingkynmaw une u syiem ba khraw ka jaid bynriew.
Kane ka jingleh burom ka KSU bad ki bor pynid skul katei ka skulbah kaba don ha Ri Bhoi, ka dei namar ba ka 17 tarik u Naitung ka dei ka sngi U Blei bad ban ai ka nam bad ka burom une u syiem ba shlur ka ri ki la pynlong ka jingleh burom kane ka lyngkhuh sngi p ba 187 jong u kum uta u khla wait ka jaid bynriew uba la len lade ban aiti la ka jingim na ka bynta ka jaid bynriew.
Haba leit buh syntiew ha u mot sah jingkynmaw jong u Syiem Tirot Sing mynta ka sngi ka KSU bad ki bor pynid skul katei ka skul JNV kaba don ha Niangbari ki la pynlong ruh ka prokram lyngkot ba la shim bynta naduh u Principal, u S.C Ramshiary, u Samla, u samla James H. Mawphñiang, uba dei u General Secretary ka KSU, North Khasi Hills District bad kynthup ruh naduh ki khynnah skul, ki nonghikai bad ki dkhot ka KSU na Ri Bhoi District.
Haba kren ruh ha kane ka sngi ba kynmaw burom ka jingdap 187 ka lyngkhuh sngi ïap u Tirot Sing, u Principal ka JNV Niangbari, u la pynpaw ka jingkmne ba ki nonglam ka KSU ki dang kynmaw une u riew shlur ka jaid byrriew Khasi bad kane ka jingleh burom ka seng ka long ruh ban dang pyrto kum kine ki riew khraw kiba la len lade na ka bynta ka jaid bynriew bad kumjuh ruh ban dang ai mynsiem ba ka jaid bynriew Khasi kan dang lah ban pynmih shibun ki riewkhraw kiba aiti la ka jingim na ka bynta ka ri bad ka jaid bynriew.
Ha kajuh ka por, na ka liang utei u Principal u la kular ruh ban dang pynbha utei u Mot sah jingkynmaw u Tirot Singh, uba la pynieng ha phyllaw katei ka skul bah bad kum u Principal u la kyntu ruh ki khun samla ka jaid bynriew Khasi ba kin dang don kata ka jingkitkhlieh ban da la ka jong ka jaid bynriew kumba pruit dak da u Syiem Tirot Sing.
Na ka liang u Samla James H. Mawphniang, General Secretary ka KSU, North Khasi Hills District haba kren ha kane ka sngi u la pynpaw ka jingkmen ba ka KSU ryngkat ki khynnah skul katei ka skul ki la lah ban kynmaw burom kane ka jingdap 187 snem ka jingkhlad noh u Syiem ba khraw ka jaid bynriew bad u kyrmen skhem ruh ba ka jaid bynriew jongngi kan dang lah ban pynmih shibun ki riewkhraw kiba kloi shisha ban aiti la ka jingim na ka bynta ka daw bah jong ka jaidbynriew.
Shuh shuh, u la ong ruh ba ka seng KSU ka shim ba ka jingbuh uno uno u mot ki riew khraw hapoh ka jylla kam dei satia tang ban pynitynnad ne pynbha briew, hynrei ka long ban burom bad ban pyrto ki kam shlur ba ki la leh na ka bynta ban da la ka jong ka jaid bynriew, u la bynrap.