Pynlut ka sorkar 11 klur ban thied jaka ha ri lum Garo na ka bynta ki projek thymmai

Shillong, Jymmang 5 : Da kaba ai nuksa ba ka jingduna jong ki jaka sorkar ka long kum ki diengpyngkiang ïa ki projek thymmai ka sorkar ka la rai ban thied haduh 119 acre ka jaka ha East bad North Garo Hills ban pynap lypa na ka bynta ban shna ïa ki University, hospital, ki skul thymmai.
Ka Kynhun Myntri hapoh ka jingïalam jong u Myntri Rangbah u Conrad K Sangma ha ka jingïakynduh mynta ka Sngi Ba Ar ka la mynjur ban thied 93.5 acre ka jaka ha Rongalgre, East Garo Hills ha ka dor 7.07 klur tyngka bad 26 acre ha Medipathar North Garo Hills ha ka dor 3.9 klur tyngka. ïa kine ki jaka la thied beit da ka sorkar na ki trai, ïathuh u nongpathai khubor ka sorkar u ma Wailadmiki Shylla.
Nalor kae u la ong ka jingdonkam ki jaka ka long ruh na ka bynta ki mini secretariat ha baroh ki district ha ri lum Garo khnang ban pynjan ïa ka jingsynshar sha ki paidbah. “ Ngi kwah ban pynjan shuh shuh ka jingsynshar sha ki paidbah bad ka ban long ruh ha kajuh beit ka jaka khnang ba ki paidbah kin suk ban leit donkam ha kajuh ka ophis” ong u ma Wailad.
“ Ngi la sngewthuh bha mynta ba ha baroh ki district haba don kino kino ki projek thymmai ka jingeh kaba hakhmat eh ka dei ka jaka namar phi tip shai ba kam long kaba suk ban shu ïoh ei ia ka jaka” ong u ma Wailad.
Kumta kane ka jingthied jaka beit na ki trai ruh ka la ïarap ïa ka sorkar ban ïoh kunai bun ka pisa kum kitei ki jaka ba thied ha ri lum Garo ka sorkar ka la ïoh ban tyngkai haduh 5 klur tam ei ei ka pisa. Kumta ka long kaba donkam eh ba ka sorkar kan don lypa ki jaka man la ki district khnang ba lada ka kwah tei kino kino ki projek ha ki por ban wan kin ym don jingeh satia namar ka jaka ka la don lypa.