Nongpoh, Naitung 16: Ban pynjan ka jingshakri sha ki paidbah ka Nongpoh Constituency bad ruh ban dang pynkhlaiñ ïa ka party na ka bynta ka election 2023 ban sa wan ha ka jylla, ka NPP Nongpoh Constituency hynin ka sngi ka la lah syndon ban plie da ka ophis treikam ba pura ha Umbuda shi bynta ban pynlong kum ka shlem ban ïa saindur ïa ki kam ka party bad ruh ban ai ka jingshakri na ka bynta ki paidbah ka Nongpoh Constituency.
Ïa kane ka ophis treikam ka NPP Nongpoh Constituency la wan ban plie paidbah da u President ka NPP, Ri Bhoi, u Bah Clement Mawlong bad la sakhi lang ruh da ka jingdon lang ka MDC ka Umsning, ka Kong Macdalyne Mawlong, u Bah Min Makri, Working President ka NPP Nongpoh Block, U Bah Rayonald Kharkamni, u samla Pyndaplang Wahlang, President ka NPYF Ri Bhoi District nalor kiwei kiwei ki heh ka party NPP.
Haba kren kane ka sngi, u President ka NPP Ri Bhoi, u Bah Clement Mawlong lem bad kiwei ki nongïalam ka NPP ki la pynpaw ba ka jingthmu ba la plie paidbah ïa kane ka ophis treikam ka NPP ha Nongpoh ka long ban dang pynkhlain ïa ki kam ka party bad khamtam na ka bynta ka Ilekshon 2023 na Nongpoh Constituency.
Ki la pynpaw ruh ba kum ka party ka la dang trei borbah ban pynklaiñ ïa ka party bad ki la pynpaw ruh ba ka party NPP ha kane ka kynti kin sei da ka Kong Macdalyne Mawlong, kaba long ka MDC ka Umsning kum ka kyrtong ka party ban ïa khun ïa ka ilekshon 2023 na Nongpoh Constituency.
Shuh shuh, kitei ki nongïalam ki la pynpaw ruh wat la don shibun ki jingkynthoh pyrshah ïa ka party NPP ha Nongpoh Constituency bad kum ki nongïalam kin nym sngap ïa kata bad kin dang pynkhlaiñ ïa ka party ha kaba ka jingthmu ka party ka long ban bteng ka jingshakri na ka bynta ka bha ka miat bad ka roi ka par ki paidbah ka Nongpoh Constituency, ki la bynrap.
Ha kane kajuh ka sngi, ka party NPP Nongpoh Constituency ka la lah ruh ban pynlait paidbah ïa ka jingrwai ka NPP party bad la don ruh bun ki Longkmie bad ki riew rangbah na ka Constituency ki la wan ban pynïasoh sha ka party NPP kum ka jingpynkhlaiñ ïa ka party shuwa ka Ilekshon 2023 ha ka jylla.
