Bun kiba kwah ban leit trei shabar jylla, hynrei bun ki kam hapoh ka jylla lajong, bad bun kim kwah trei

Ka la don shibun bah ki khep, ba ki thei samla Khasi jong ngi, ki ju shah shet shukor, ha ki jingkhaiï ne nong khaïi met, hynrei ki dang bun kiba shah pynngop bad ki bym peishkor satia bad ki sa kyndit thret kumba shah sam ha u thyrnia uba nep, ynda haba ki la poi ha ki ruhnar jong kitei ki nongkhaïi met.
Kito kiba shah pyngngop bha, ki dei kito kiba dang lung ka jingmut jingpyrkhat jong ki, kiba dang don ha ki khad snem bad ïa kitei la pynngop ha ka shong liengsuiñ bad ka leit kai pyngngad sha ki nongbah baheh jong ka India, kum sha Delhi, Mumbai, Bangalore, Chennai; hynrei kitei ki ngop ban leit sah sha ki ïing jong ki nongdie met bad kiba kamai da ki phew lak, na kitei ki thei samla.
Ka jingtlot jingmut jong ki khun samla jong ngi, ka long ba la tyrwa ïa ka tulop kaba kumba T.10 lane haduh T.20 hajar, hynrei na itei i jingïoh ki ïa beh khohreh ban mih shabar na la Ïing bad katei ka pyni, ba ka jingkheiñ jingdiah, ïa ka shong ka sah, ka bam ka dih, ka ïing ka sem, ka jinglut jingsep, kam don satia; namar ba ynda haba ki la poi sha ri dkhar, kin sa sngewthuh, ba tang ka bai wai ïing, ka bai bam, la hap ban pan pisa shuh na ki kmie ki kpa bad katei ka dei ka jingrem dor, haba leit sah sha ki nongbah kiba heh jong ka India bad kumta ha katei ka tulop kaba T.20 hajar ha Delhi, ka la biang eh, ban sah ha la ïing ban leit trei kynta sait jaiñ ne ban sah bylla ha ki ïing briew kiba dei hi ki para doh parasnam ki Khasi bad ïoh ka bam bad ban ïoh T.5 hajar shibnai, namar ba ka jinglut kam don eiei, haba ïa shong ïa sah lang bad ki kmie ki kpa lajong.
Kane ka jingjia, kam dei satia tang ïa ki samla kynthei, hynrei ki don bun ki samla shynrang ruh, kiba ngop ïa katei ka T.15 ne T.20 hajar bad kitei ki ju shah pyndik tyngeh, ynda ki la poi sha kitei ki jaka trei jong ki shabar jylla, khamtam, lada ki poi sha ki jylla ba shatei jong ka India.
Ka jingkylli kaba kongsan bha hangne, ka long, ba ha kat kata ka jylla, kaba riewspah tam ha India (lait noh ka Tamil Nadu), kumno sha, ba ki samla jong ka, ki leit poi bylla sha kylleng ki nongbah jong ka India bad kumno sha, ba ki leit poi sha Japan, sha Singapore bad sha kiwei de ki ri ban leit wad bylla?
Ka jingshisha, ka long ba ki don da ki phew hajar ngut ki samla Khasi, Garo, kiba leit sha kylleng ka India, ban wad kam ban pyndap ïa la ka kpoh bad kane ka dei ban sangeh noh shisyndon, namar ba kumno ka Meghalaya, kaba don tang kumba 30 lak ngut antad ki nongshong shnong, kam lah ban pynbiang ïa ki briew lajong bad ka pyn ïa syriem bad ki jylla kiba heh jong ka India, kum ka West Bengal, Bihar, Uttar Pradesh bad wat kitei ruh, kim shu leit makia satia, lada kim tip bha ïa ka jingheh kamai, ha shwa ba kin mih na la ïing.
Kum ban shu pynpaw hangne ba bun bah ki longïing ha Nongbah Shillong bad ki longïing ba khap sor kiba wad nongbylla shong ïing ban ïarap pynpeit khun rit, ne ban pynpeit ïa ki ïing ha ka por ba ki trai ïing ki leit la ki jong ki kam ki jam ne kiwei kiwei pat ki jingdonkam, hynrei ba bun pat na kine kiba wad nongbylla ne nongtrei ïing ki pynpaw ki jingeh naba ym ju kham ïoh Koit ïa ki thei khasi jong ngi kiba mon ban trei ïing briew bad kumjuh ruh napdeng ki katto katne pat kiba wan trei ki neh kai tang katto katne sngi ne katto katne bnai ban shu mad ja, bad tang shu kynduh jingïamai ne shah mai ha ki nongai kam ki la phoi bad thud bad ki kloi pat ban iehnoh ïa ka kam bylla jong ki bad don pat kiba wan trei tang ban thied mobile ne ban wad paralok shyieng krung ne kiwei pat ki daw, kham ñiar eh ban don ki samla Khasi jong ngi kiba da wan bylla hok shisha bad kine ruh kidei na kito ki longïing kiba da kyrduh shisha.
Kumta kan long pat kaba lyngngoh haba ki leit trei pat shabar jylla ki da mad ki jingeh ba laiphew jait ki neh beit bad ki ïaleh ruh katba lah ban buhrieh, lait satang lada ka lah paw pynthei kin sa leit rieh tngen ban ong ba ki lah jan shah leh kumne kumtai bad halor kane dei ruh ban kyndit bynriew noh kloi.