Shillong, Jymmang 02: Kum shi bynta jong ka jingpyrshang ban pynroi ïa ki jingtei haba ïadei bad ka kam ïalehkai, u Myntri Rangbah ka jylla Meghalaya u Conrad K Sangma, ha ka sngi Saitjaiñ (02 tarik Jymmang 2026) u la plie paidbah ïa ka madan ïalehkai bad ïa ka Indoor Sports Stadium ha Umlyngka, Upper Shillong.
Ha ka jingïalang plie la ïadon lang ruh u MLA ka Mylliem bah R V Lyngdoh bad u Deputy Chief Whip bah Hamletson Dohling uba long ruh u Adviser jong u Myntri Rangbah ka jylla. ki ophisar na ka tnad ïalehkai, ki dkhot jong ka Dorbar shnong bad ki nongshong shnong.
Kane ka projek ha ka jinglut kaba T. 3.5 klur, ka kynthup ïa ka Indoor Sports Hall ba la shna pura ryngkat bad ka jaka ïalehkai Badminton, ki kamra khreh, ki painkhana ryngkat bad ka kamra treikam (Official Room).
Haba ai jingkren ha ka jingïalang, u Conrad K Sangma, ula ong ba ka sorkar ha kine ki khyndiat snem ka la pyrshang ban wanrah ïa ka roi ka par ha baroh ki bynta jong ka jylla.
“Kum ka sorkar Ngi dei ban sngap ïa ki jingeh jong ki paidbah bad ban im katkum ki jingdonkam jong ki, bad nalor ki kam pynroi ngi ngeit ba ka jingbei tyngka ha ki samla bad ka imlang ka sahlang ka dei kaba kongsan tam,” u la ong.
U la ong ba kane ka projek, ka dei ka jingbei tyngka ka ban pynmih ïa ki nongïalehkai kiba kynsai, kiba trei shitom bad ki ban don ïa ka jinglong kaba ryntih ym tang ha ka kam ïalehkai hynrei ha man la ki bynta jong ka jingim jong ki. “Kane kam dei ka jingpynlut hynrei kum ka jingkynshew tyngka ha ki samla jong ngi bad na ka bynta ka lawei jong ka jylla jong ngi,” u la ong.
U la pynkynmaw ruh ïa ki jingïarap bapher bapher jong ka sorkar ym tang na ka bynta ban pynroi ïa ki jingtei hynrei ban kyrshan ruh ïa la ki jong ki nongïalehkai bad ki synjuk ïalehkai hapoh ka jylla ba kin nang kiew shaphrang.
U la kyntu ïa ki paidbah ban shim ïa ka jinglong trai bad ka jingkitkhlieh ïa katei ka jaka ban pynthikna ba kan dang long kaba itynnad bad kaba treikam.
La khmihlynti ba kane ka jaka kan long ka jingmyntoi ïa kumba 3000 ngut ki khynnah bad samla jong ka thaiñ khamtam eh na ka bynta ki khynnah skul jong ka Umlyngka Pre-Secondary School, San Shnong Secondary School, Phila Rapsang Secondary School, bad ka Thomas Jones Secondary School.
