Da ka jingtah bad ki jingthoh ha baroh ka jylla yn pynlong ki Nonghikai Deficit Grant in-Aid

Shillong, Jymmang 2 : Ki Nonghikai Deficit Grant in -Aid Schools bad College hapoh ka jylla kin pynlong da ka jingtah bad wah Poster ha kylleng ka jylla ha ka 4 tarik Jymmang 2026 ha kaba ki nongmihkhmat na ki District bapher bapher kin lam khmat ïa kane ka jingtah poster ha man la ki district ban pynpaw ka jingpyrshah jur ïa ka Meghalaya Non Government Schools and Colleges Employees Centralised Fund Scheme 2026.
ïa kane ka prokram la pynlong kum ka jingïakhih ba jai jai ban pyn paw ïa ka jingsngewkhia jur jongki Nonghikai , ki Nongtrei ha ki skul bad college, kumjuh ruh kito kiba la shongthait na ka kam halor kane ka skhim kaba la kyntait da ki Nonghikai bad ki Nongtrei jong kine ki skul bad college Deficit Grant in Aid. Ki la pynpaw ba kane ka skhim ka ktah jur ïa ka jingïoh jong ki hajar ngut ki nongtrei bad nonghikai jong kine ki tnad pule deficit grant in aid.
Lyngba kane ka poster campaign ki nonghikai bad ki nongtrei ki kyntu ïa ka sorkar jylla ban burom ïa ka hok jongki, ban pynneh ïa ki kyndon ba la don lypa bad ban kiar na kaba pyntreikam ïa ka polisi kaba ktah ïa ka bha ka miat ki nonghikai ba dang trei bad wat kiba la shongthait ruh.
Ki Nonghikai bad ki Nongtrei jong kine ki Deficit Grant in Aid skul bad kolej ha baroh ka jylla kin ïa shim bynta ha kane ka jingïakhih ba jai jai da kab rah ïaki placard bad ki poster ha ki jaka trei bad jaka hikai jongki bad kumjuh ruh haki jaka paidbah. Ki shim ïa kane ka rai ban dawa ïa ka hok, ban leh da ka jingkhuid jingsuba bad ban ïada ïa ka jingïoh ba shitra jongki.