Ban kyntiew ïa ka kam jngohkai, donkam ïa ka jingieit bad ban don ruh ki lynti ki synkien kiba bha

Mawkyrwat, ‘Naitung, 15: Ka South West Khasi Hills District katba nang ïaid ki sngi ka la sdang ban paw ha ka jingdon ki jaka jngohkai kiba itynnad, watla ka dang long ka distrik ba dang lung haba ïa nujor bad kiwei pat ki distrik hapoh jong ka jylla Meghalaya namar ïa ka la pynïakhlad na ka West Khasi Hills District ha ka 03 tarik u ‘Nailar, 2012.
Ban shu kdew khyndiat ba ka jingdon jong ki jaka shang pyngngad ne ki jaka jngohkai ha South West Khasi Hills District ki don shibun bah la ka long ha ka jingdon ki lum ki wah kiba itynnad bad ka lyer ba ngi ring mynsiem ruh ka dang long kaba khuid. Kumta da ka jingdon ki ka la long kawei na ki lad ban ai ki lad kamai jakpoh ïa ki katto katne kiba nang ban pyndonkam.
Ha kajuh ka por lah ban ong ruh ba ka jingdon jong ka Hot Spring ne ka Umshit hapoh Lawblei, ka Mawranglang Viewpoint ha shnong Mawranglang, ka Tynrong Phohrangkshu ha shnong Nonglang, Synrang Ringai ha shnong Mawten, ka Krem Mawtynhiang ha shnong Nongnah, ka Deborlew South Riwar Viewpoint ha shnong Tynnai, ka Kynrewmyllah Adventure Training Centre & Eco Tourism (KATC&ET) ha shnong Mawranglang bad kiwei de ki jaka jngohkai kiba don ha ki thaiñ Ranikor kiba la long ka jingai jingmyntoi shibun na ka bynta ki paidbah kiba donkam ne ïa ki briew kiba wan kai pyngngad hapoh South West Khasi Hills District bad ha ka juh ka por da ka jingdon jong kine ka la ai ruh ki lad ban ai kam ai jam na ka bynta ki khun samla.
Ha kaba ïadei bad ka jingdon ïa ki kshaid ka South West Khasi Hills District ka don kyrhai ïa kshaid ba noh rymphum, kum ka kshaid Tyllang, ka kshaid Chaid-Chaid, kshaid Phot Rai Rai, kshaid Urjjaw-ti-bah, kshaid Chum-Chum, kshaid Urnar, kshaid ‘wei Mawknot, kshaid Phot Long-on, kshaid ‘non Ksiar, ka kshaid Od-Ringai, ka kshaid ‘wei Dong-sniang, ka kshaid Sum-sniang, ka kshaid Riat Pairo, ka kshaid Syaw, ka kshaid Mawïong bad kiwei de.
Hynrei ka long pat kaba sngewsih ba lada ïa kine ki jingai kiba kyrpang ki jong U Blei lada kum ki paidbah nongshong shnong kim nang ban sumar bha ne tyngkai ïa ki ha ka rukom kaba dei bad pyn-i-tynnad, ha kaba kan sa poi ka por ha kaba ki lum, ki wah, ki umbam umdih bad kumjuh ruh ka lyer kin sa kylla jakhlia noh ha kawei ka sngi bad kan sa long ka jingtim ïa ngi hi ha ka pateng ka ban sa wan.
Kumta ha kaba ïa dei bad kane ka bynta u nongthoh khubor haba ïoh ban lum jingtip na ki katto katne ngut ki briew kiba ju leit kai pyngngnad na kawei kawei sha kawei pat ki la pynpaw ka jingsngewkmen ban ïohi ïa ki lum ki wah, ki dieng ki siej bad kumjuh ruh ban ïoh ring mynsiem ïa ka lyer kaba khuid bad khamtam eh haba ki poi ha kane ka South West Khasi Hills District, namar ka dang don shibun ki jaka shongkai pyngngad la ka long ki jaka jngohkai kiba la plie kyrpad bad kumjuh ruh ki jaka kai pyngngad kiba la ai bad buh kyrpang da U Blei.
Shuh shuh ki la pynpaw ruh ba haba ki la poi hapoh jong ka Mawranglang Viewpoint ki la pynpaw ba da ka jingdon jong ka wah rilang ka la khring lypa ïa ki khmat jong ki ban peit itynnad bad kumjuh ruh ha Tynrong, Mawlangwir ba na ka liang jong ki ki la ïoh ban ïuh-kjat ki la ai ka jingïaroh na ka bynta ka jinglah jong ki shnong ki thaw bad kumjuh ruh ki bor ba dei peit jong ka distrik ha kaba ki la la ban pynurlong bad pynïeng ïa ki maw sahnam jong ki Syiem bad jong ki Myntri. Ym tang kata kine ki jaka jngohkai ba itynnad bad ba pyngngad ki khring ruh ïa ki ban ïohi ïa ki lum ki wah kiba ithiang kiba don sha kine ki thaiñ.
Haba phai pat sha kawei na ki jaka jngohkai ha Shnong Tynnai ki nongwan jngohkai ki la ai ka jingïaroh ïa ka jingitynnad ka jaka namar na kane lah ban ïohi ïa ka them jong ka Ri Bangladesh lada dei ha ka por ba shai bha ka bneng.
Ha kawei pat ka liang, ki nongwan jngohkai pyrthei ki la pynpaw ba watla ka South West Khasi Hills District ka don shibun bah ki jaka jngohkai hynrei kaba sngewdiaw ka long namar ki surok ha kine ki thaiñ kim pat don ïa kita ki surok kiba bha haba ïanujor bad kiwei ki jaka ba ki ki la ïoh ban leit. Namarkata, ki la buh ka jingkyrpad ïa ki bor ba dei peit naduh ka tnad treikam jong ka Public Work Department (PWD) Road, ïa ki nongmihkhmat bad kumjuh ruh ïa kiwei de ki tnad treikam kiba dei ha ka liang ka kam jngohkai pyrthei ba kin sngewbha ban ïa peit lang ïa ki jingdonkam ban wanrah ïa ka roi ka par ne pynbha ïa ki lynti ki synkien, namar ba haba don ki jaka jngohkai kiba itynnad ki la dei ban shim ruh ïa ka jingkitkhlieh kumno ban pynbha khnang ba haba ki briew kiba nabar jong ka jylla ki wan kai pyngngad ha kine ki jaka kin ïoh ban rah ruh ïa ki khubor ba bha sha kiwei pat ki briew.
Na ka liang jong ki, ki la buh ruh ka jingkyrpad na ka bynta ki paidbah nongshong shnong jong ka South West Khasi Hills District baroh kawei ba ki dei ban long borabor kiba leh khuid ïa ki sawdong sawkun bad ba kim dei ban long ki nongshun jong ka mariang namar ba lada ki pom pathar ïa ki dieng ki siej ne wiang ding ïa ki lum ha ki por tlang, tang kata ka jingitynnad ka la duh noh bad kiei kiei kiba don ha ka kin sah jah rngai noh.
Ha kajuh ka por, kum ki nongshong shnong ki dei ban don ruh ka jingkitkhlieh na ka bynta ka khuid ha suba khamtam eh ha ki jaka jngohkai. Ki la buh ruh ka jingkyrpad ïa ki paidbah nongshong shnong jong ka distrik ba kim dei ban don ka mynsiem jingbishni ïa ki briew kiba nabar hynrei ki dei ban don ka mynsiem jong ka jingieit bad burom ïa ki khnang ba kan long ka jingmyntoi ïa ka distrik bad kan kyntiew ruh ïa kam jngohkai pyrthei.