Shillong, Ïaiong 29: Kiba haïing jong uwei u lanot ba la lap ïa ka met ïap na 3 Mer, Riatsohkhlur Upper Shillong ki kwah ba ki pulit kin register kum ka case ba shah pynïap.
Kum ban shu kdew ïa une u lanot la tip kyrteng kum u Vinay Kumar Singh 21 snem ka rta.
Na ka liang u kpa jong une u lanot u la ujor da ka ejahar ha Jhalupara Police Station ha ka 26 tarik mynta u bnai Ïaiong.
Katkum u kpa, u khun u la pyntip sha u na Laitumkhrah ha ka 22 tarik u Ïaiong ha ka por mynsngi ba ka scooty ka jong u kala aksident hynrei kadei tang kaba rit bad kawei ka maruti car.
Na ka liang u kpa u la poi sha katei ka jaka.Ka jingjulor ka long kaba rit bad ïa kane ka jingjia la dep ban ïa kren sngewthuh jingmut bad u trai kali ha Laitumkhrah Police Station bad hadien kane u khun u la leit noh sha Nongmynsong ban kynduh ïa ki paralok.
Haba u khun u khlem pat poi ïing haduh ka por 7.30 pm, u kpa u la sdang ban wad ïa u ha kylleng ki jaka jong ka sor Shillong bad kumjuh ruh ki jaka ba marjan, hynrei ym shym la lap ksai satia.
Na ka liang jong ka ïing kila pyrshang ruh ban phone ïa ki paralok jong u hynrei khlem ioh satia.
Ha ka 23 tarik u Ïaiong ha ka por kumba 9 baje mynstep, u kpa u la ioh pdiang ïa ka phone na u Secretary jong ka shnong uba la phah ban wan mar mar ïa u sha hajan ka Bomver Market Complex, 3 Mer, Upper Shillong.
Haba poi ha katei ka jaka u kpa u la kyndit hi thret ban iohi ba ïa ka met u khun jong u la teh da u ksai ha kawei ka jingker kaba don marjan bad ka ATM SBI.
Na ka liang jong u kpa u la suba jur ba u khun jong u, u la shah pyniap bad hadien kata ïa ka met jong u la teh noh da u ksai ha ki jingker ne railing ban ioh ba kadei ba u la shim hi ïa la ka jong ka jingim.
U la kyntu ïa ki Pulit ba kin register ïa ka ejahar ba shah pynïap bad ban tohkit ruh ïa u paralok jong u, u Rohit Rai uba leit ban kynduh khatduh ha Nongmensong.
