Shillong, ïaïong 29: Sa shi sien ka Janepih YSCA ka la pynshisha ïa ka jingkhlaiñ jong ka da kaba pynjemkhnap haduh 6-0 kol ïa ka Attong Matgrik FC ha ka jingïalehkai jong ka Group G ha ka lympung 5th Meghalaya State League kaba la long hynne ka sngi Balang ha Williamnagar.
Ha kane ka jingïakhun la sakhi ïa ar tylli ki hat trick ba la thep da u Rishembhalang Wanniang (38′, 74′, 90′) bad u Akhebor Langrin (10′, 41′, 45′) katba ka Janepih ka la nang pynjlan ïa ka jingïalehkai khlem shah rem ban khur ïa ka jingjop kaba saw hadien san tylli ki jingïalehkai.
Kane ka dei ka jingjop kaba khraw tam jong ka Janepih ha kane ka lympung haduh mynta, bad ka sah sa tang ma ka ka klob ha ka MSL 5 ka bym pat shah thep wat tang shi kol ha ki kynhun liang pyrshah. Ha kawei ka liang, na ka bynta ka Attong Matgrik, kaba don sha trai duh jong ka Group, kane ka dei ka nam rem kaba saw ba ki la mad ha ki san tylli ki jingïakhun.
Ka la don ka jingpynkylla ha kaba ïadei bad ka prokram ïalehkai, ha kaba ki jingïakhun jong ka Group A ba la buh ban long ha ka sngi Thohdieng bad Saitjaiñ la pynkynriah bad kin long ha kane ka sngi Palei ha madan First Ground-SSA Stadium ha Shillong. Ha ka por 1 baje nohphai sngi ka Mawshun SCC kan ïakhun pyrshah ïa ka Khimusniang SC bad ha ka por 5 baje janmiet ka Nongkseh SSCC kan aireng pyrshah ïa ka Umkaber SC. Ha Williamnagar ka Balmanduri FC kan ïakhun pyrshah ïa ka Maram FC ha ka por 3 baje nohphai sngi kumba la buh.
