Pyllait ïa ki Nonghikai na ka kam Census, dawa ka JSM ïa ka sorkar

Jowai, Ïaïong 28: Ka Jaiñtia Students’ Movement (JSM), Western Region ka la phah ka jingthoh sha ka Chief Executive Officer and Charge Census Officer, Jowai Municipal Board, halor ka jingpynkhreh ban thung Enumerators bad Supervisor na ka bynta ka Census 2027.
Ha kane ka jingthoh, ka seng kala kyntu ïaka sorkar ba kan nym pyndonkam tang da ki nonghikai (teachers) ha ki kam Census. Watla ka seng ka ithuh ïa ka jingkordor jong ka Census kum ka kam paidbah ba kongsan hapoh ka Census Act, 1948 bad ka Census Rules, 1990, hynrei ka JSM ka kyrpad jur ïa ki bor ba dei khmih ba kin pyllait ïa ki nonghikai na kane ka kam, lane ym ban shim bun ïaka por jong ki, khnang ba kan nym ktah ïaki khynnah skul kiba pule.
Ka JSM kala ong ba ki nonghikai kila don lypa ha ka jingkitkhlieh kaba khraw ban ai jinghikai ïa ki khynnah bad ban pynneh ïa ka jingbha haka pule-puthi. Lada pyndonkam tang da ki ha ki kam Census, khamtam ha ki por skul, kan ktah jur ïaka jinghikai-jingpule, ka calendar skul bad kan buh ruh ïaka jingkhia kaba tam haki nonghikai.
Kumta, ka seng kala ai jingmut ba ka Sorkar kan pyndonkam da ki briew shnong ban ïarap naka bynta bapher bapher ban pyndep ïa ka kam Census. Ki briew ba lah ban pyndonkam ki kynthup ïa ki nongtrei shnong (local authority staff), ki dkhot Village Council/Dorbar Shnong, ki samla kiba la nang la stad, ki Volunteer bad kiwei pat ki briew kiba la biang bad kiba tip bha ïa la ki shnong.
Halor kane, ka jingpyndonkam ïa ki briew shnong kan ïarap ban pynïaid beit ïa ka kam Census bad ruh kan pynshlur ïa ki paidbah bad ka jingsngewtrai shnong ha kane ka kam ba kongsan.
Ka JSM, Western Region ka kyrmen skhem ba ki bor ba dei khmih kin shimkhia ïa kane ka jingkyrpad haka jingmyntoi lang jong ki samla pule, ka rukom pule bad ka jingjop jong ka Census 2027.