U Samla Lambokstarwell Marngar, u Samla Biangbor Paliar bad u samla Donald V. Thabah

Shillong, Ïaïong 28: Katno ka jingbynnud bad jingsngewsih kaba khraw ban phaidien sha ka jingim ki nongïalam kiba la aiti lut ïa la ka jingim shimet na ka bynta ka jaitbynriew Khasi lyngba ka Khasi Students’ Union (KSU). Napdeng jong kine, ki laingut ki nongïalam ba paw bha ki long u Samla Donald V. Thabah, General Secretary ka KSU bad u Samla Lambokstarwell Marngar, President ka KSU bad u Samla Biangbor Lyngdoh Paliar, ki long kiba la trei shitom, khlem tyngkai bad kiba la aiti lut met bad mynsiem na ka bynta ka Ri bad ka jaitbynriew.
U Samla Donald V. Thabah u la pynïasoh ïalade bad ka KSU naduh ka rta 18 snem kaba u dang khynnah samla, kum u samla uba stad bad uba trei shitom, u la ïohi shai ïa ki jingeh kiba ktah ïa ka imlang sahlang ha Mawprem, naduh ka jingïakhleh jaitbynriew haduh ka jingkiew jong ki kam sniew bad ka jingbym shngaiñ jong ki trai ri. Kane ka jingsngewkhia ka la pynlong ïa u ban shim ïa ka sienjam kaba nyngkong da kaba rung ha ka KSU Mawprem Circle.
Naduh katei ka por, ka jingïaid lynti jong u ka la kiew stet: kum u General Secretary ka Mawprem Circle, Organising Secretary ka NEHU Unit (2007), Assistant Publicity Secretary CEC (2008), Education Secretary CEC (2012), bad naduh u snem 2017 haduh ka samoi treikam 2023-26 u la long u General Secretary ka KSU CEC. Ka jingïai aiti jong u kam dei tang ha ka kyrdan, hynrei ka paw ha ka jinglenlade, ka jingïaleh bad ka jingïaineh ha ki por jingeh wat haba u hap ban mad ïa ki jingshah thwet kiba lah bunsien, ki jingshah kynthoh bad ka jingduh ha ka jingim shimet jong u.
U Samla Donald u long u nongïalam uba stad, uba tihbniah bad uba skhem ha ki nongrim. U long u hynmen ïa ki dkhot kiba dang rit bad u para ïa ki nongïalam kiba rangbah. Ka mynsiem jingïarap, ka jingïadei jan bad ki paidbah bad ka jingïalam kaba shlur ka la pynlong ïa u ban long uwei na ki nongïalam ba ki paidbah ki shaniah bad burom. Watla ki aiñ sorkar bad ki mokotduma kiba bun u la shah pyngngat, hynrei ka mynsiem jingïaleh jong u na ka bynta ka jingshngaiñ ka jaitbynriew ka dang ïai kyrsiew mynsiem bad pynrhem ïa kiwei ki samla Khasi ban ïasoh sha ka KSU ban ïada ïa ka jaitbynriew.
Ha kajuh ka por, u Samla Lambokstarwell Marngar u dei ruh u nongïalam uba tbit shisha ha ka jingïaid lynti jong ka KSU. U la sdang kum u dkhot ha KSU Jaïaw Lansonalane Unit, hynrei namar ka jingtrei shitom bad ka jingïai aiti jong u, u la kiew sted kum u nongïalam KSU nyngkong kum u General Secretary ka Unit bad hadien hapoh ka Jaïaw Circle kum u General Secretary.
Ka jinglong jong u kum u briew uba beit, uba sngewrit bad uba lah ban pynïatylli ïa ki dkhot ka la pynlong ïa ki nongïalam ban ithuh ïa ka sap jong u.
Hadien, u la rung hapoh ka KSU CEC bad u la bat ïa shibun ki bynta: kum u Assistant Education Secretary, President ka KSU NEHU Unit ha ka por ba pynkhie im biang ïa ka, bad kum u Finance Secretary. Ha u snem 2017, u la shah jied kum u President ka KSU CEC bad ha u snem 2020 u la bteng khatduh ha ka juh ka kyrdan haduh ka samoi 2023-26.
U Samla Lambokstarwell u long u nongïalam uba kohnguh sneng, uba burom ïa ki rangbah bad uba ïaineh ha ka hok. Kum u nongïalam, um ju iehnoh ïa ki dkhot, hynrei u don bynta lang bad ki ha baroh ki por, naduh ki dkhot barit haduh ki nongïalam ba rangbah. U dei ruh u briew uba shlur ban kren ïa ka jingshisha, uba skhem ha ka nongrim bad uba don ka jingïohi jngai bad ka jingmut kaba sngur.
Ka jingpule jong u ruh ka long kaba lah biang bha: u la pyndep ïa ka MA Philosophy na NEHU. Wat haba u la ïoh lad ban rung ha ka kam sorkar kaba don burom, u la kyntait noh namar u jied ban aiti lut ïalade ha ka jingïalam jong ka KSU bad ka jingshakri ïa ka jaitbynriew Khasi.
Katba u Vice President ka Seng u Samla Biangbor Lyngdoh Paliar u la rung sha ka seng KSU ha u snem 1998 lyngba ka Unit- Nongkwar unit bad ka kam ba la u bat ka dei Finance secretary Nongkwar Unit, nangta sha ka kyrdan President Nongkwar Unit, Office secretary, Mawlai Circle, nangta General secretary Mawlai Circle, Astt Organising Secretary CEC, Organising Secretary CEC.
Nangta u la bat ruh ïa ka kam Vice President CEC, U la shah kem bunsien ha ki issue bapher bapher jong ka seng. U la shah pynshitom ruh ha ki bor ka aiñ kat haduh ban da mynsaw bad haduh kine ki sngi u dang bat hi kum u President ka KSU Mawlai Circle.
Lah ban ong ba kine ki lai ngut ki nongïalam ki dei ki nuksa ba im jong ka jingïalam kaba shisha, ka jingïalam kaba wan lyngba ka jingïaiti, ka jingïaleh bad ka jingïaineh, wat ha ka juk internet kaba ki riew wohdong-wohnia ki shim kabu tang ban kynthoh na ki kyndong kynshrot. Kine ki nongïalam ki la mad ïa shibun ki jingeh, ki jingshah pharep, ki jingshah thwet, ki jingshah pyntyrha bad wat ki jingshah thep mukotduma hynrei kim shym la kynran dien. Ki la ïaineh ban ïeng ha ka hok bad ban ïada ïa ka Ri bad ka jaitbynriew.
Kum ka jaitbynriew, la dei ban sngew sarong ba ka KSU ka lah ban ïai sei kum kine ki nongïalam kiba shlur, kiba ym ju pyndem bad kiba long ka jingïatylli jong ka mynsiem paidbah. Ki dei ki “Khlur ka Ri” kiba tynshaiñ lynti ïa ki pateng ban wan.
Ha ka jingïakren bad kiba bun ki dkhot ka KSU kiba ym lah shuh ban pynpaw kyrteng naba ki la bun ki la pynpaw ïa kine ki kyntien, “Khublei shibun ïa u Samla Donald V. Thabah, u Samla Lambokstarwell Marngar bad Samla Biangbor Paliar ïa ka jingïai aiti bad jingïaleh jong phi. Ngi duwai ba U Blei un dang kyrkhu ha ka koit ka khiah, ka jingstad bad ka mynsiem ban bteng ïa kane ka lynti kaba eh hynrei kaba don burom. Maitshaphrang ki Nongïalam ka Ri, Im slem ka KSU, Im slem ka Bri U Hynñiewtrep. “Wat tieng la phi dei ban tur na ka ding ne da ka snam, kin poi tang ki briew ba shlur sha ka kyrdan jong ka nam, dei ha u rangbah keiñ, ka shong ka mon ba jwat, ïa u phi lah ban beiñ hynrei kumno phin rat,” pynkut ki dkhot ka KSU da ki kyntien shongsbai u Myllung Soso Tham.