Nongpoh, Lber 22: Ka Confederation of Ri-Bhoi People mynta ka sngi kala dawa syndon naka sorkar ba ka dei ban pynlait noh ïaka pisa halor ka jingpyntrei ïaka skhim MNREGA ha man la ki shnong namar bun naki shnong haka thaiñ Ri-Bhoi ki kynduh jingeh bad hap ban pynsangeh ïaki kam ki jam tang naka daw ka jingbym don pisa.
Haba kren sha ki lad pathai khubor mynta ka sngi u Bah Bandari Ryntathiang President ka CoRP Ri-Bhoi District u la ong ba kum ka seng ka dap da ka jingsngewkhia halor ka jingud jingnam jong kiba bun ki nongïalam shnong namar ka jingsahkut ka pisa naka jingpyntrei ïaka skhim MNREGA naduh ka bai trei bai tiar bad kiwei kiwei kaba kum ki shnong kila mad jingeh ban pyntyllun ïaki kam pynroi haka shnong.
U la ong ruh kane ka jingpynsahkut jong ka sorkar ban pynlait ïaka pisa kala wanrah ka jingduhnong kaba khraw ïa kiba bun ki shnong ha Ri-Bhoi ban bteng ïaka kam bad bun naki paidbah kiba ju bylla kila duhkam duhjam.
Namarkata kum ka seng kala dawa naka sorkar ba ka dei ban pynlait noh mardor ïaka pisa bad lada ka sorkar jylla ka dang pynslem kum ka seng kan sa ai ruh da ka jingthoh wat sha ka sorkar pdeng ba ka dei ban pynlait beit ïaka pisa sha ki Dorbar Shnong ban pynkloi ïaka jingpynlait ïaka pisa naka bynta ka jingmyntoi ki paidbah.
