Dawa ka JAC na u DC-EJHD ban pynsangeh shwa ïa ka jingjurip na bynta ka High Speed Corridor

Khliehriat Iaiong 27: Ki nongialam bad ki dkhot jong ka Joint Action Committee jong ki ar shnong ba kynthup ka shnong Huroi bad Lahaleiñ ki shnong kiba don ha khappud bad ka ri Bangladesh mynta ka sngi ki la iakynduh ïa u Deputy Commissioner ka East Jaiñtia Hills District bad ki la uh ruh da ka jingthoh ha kaba ki la dawa ba dei ban pynsangeh shwa ïa ka jingjurip na ka bynta ka surok high speed corridor hapoh shnong Huroi, Lahaleiñ kynthup ka Umpyrshin.
Katkum ka shithi ba la soi da u Chairman ka JAC, u bah Pynskhem Suchen bad u Secretary ka JAC, u bah Rolan Suting ka JAC ka la pynpaw bad ieng ha ka nongrim ba ïa mynta ka shnong Huroi bad ka shnong Lahaleiñ ka dang don hapdeng ka jingbym pat ïa beit na ka daw ka jingmih ka ka shnong Umpyrshin kumba la pynbna da ka Jaiñtia Hills Autonomous District Council, Jowai bad kane ka shnong ka don papdeng ka shnong Huroi bad Lahaleiñ kaba dei ka shnong kaba la shu pynbna khlem ka jingtip bad khlem ka jingmynjur ki shnong ba marjan, kata ka shnong Huroi bad shnong Lahaleiñ, ki la ong ruh ba kane ka jingleh ka District Council ka dei kaba la shu leh lyndet ïa ki briew jong ka thaiñ, ka JAC ka la kynnoh ruh ba ka jingpynbna shnong ka JHADC ïa ka Umpyrshin ka dei ruh kaba beaiñ kaba la shu iuhroit ïa ka hok kaba khlem ïaid katkum ki kyndon, halor kane ka JAC ka la dep ujor ruh sha ka Jaiñtia Hills Autonomous District Council bad ïa kane ka kam ka council ka la aiti sha ka Tribunal bad haduh mynta kane ka kam ka dang don hapoh ka jingbishar bad jingpeit bniah jong ka Tribunal.
La pynpaw shuh shuh ba lada wan ban jurip ban shna ïa ka High-Speed Corridor ha kaba kum kane ka por kan ktah haduh katta katta ïa ka hok jong ka shnong Huroi bad shnong Lahaleiñ bad ioh kan mih pynban kaei kaei ka bym sngewtynnad hapdeng ki nongshong shnong ha ka thaiñ kaba lah ban ktah ïa ka suk ka saiñ ha ka thaiñ, kumta ka JAC ka la kyrpad ïa u Deputy Commissioner, Manish Kumar, IAS ban sngewbha ban sangeh shwa ban phah jurip bad ban pynsangeh shwa ïa kane ka jingthmu ban shna ïa ka High-Speed Corridor hapoh ki ar shnong ba kynthup ruh ia ka bynta jong ka Umpyrshin kaba dang don mynta hapdeng ka jingbym pat lah ban ia pynbeit.
Kane ka jingleit iakynduh ka JAC ïa u Deputy Commissioner ka dei halor ka jingioh pdiang jong ka shnong Huroi bad shnong Lahaleiñ ïa ka shithi na u Deputy Commissioner ba la pyntip ba kan sa don ka jingwan jurip na ka bynta ban shna ïa ka surok bah High-Speed Corridor ka ban iaid lyngba na shnong Huroi bad shnong Lahaleiñ.
Kum ban shu phai dien, ba ha ka jingialang paidbah ba la pynlong myn sngi siatjaiñ ha shnong Huroi ki paidbah nongshong shnong jong ka Huroi bad Lahaleiñ, ki la pynpaw ka jingsngew khia bad sngew bitar ruh halor ka jingioh sanad u bah Johny Suchen uba kam ba u dei u Rangbah shnong jong ka dong Umpyrshin ha kaba ka shnong Huroi bad shnong Lahaleiñ ka la dawa jur ba dei ban pyndam noh ïa kane ka sanad waheh shnong bad la sawa jam ruh ka sur jong ki paidbah ba lada ka Jaiñtia Hills Autonomous District Council kam lah ban pynurlong ïa ka jingdawa, ki nongshong shnong kin pyrshah jur ïa ka jingthmu ka sorkar ban shna ïa ka surok bah High Speed Corridor kaba ïaid lyngba na shnong Huroi, Lahalein kynthup ruh ka Umpyrshin bad ong ruh ba ka Umpyrshin ka dei tang kawei na ki dong kaba dang hap hapoh ka shnong Huroi.