Nongstoiñ, Ïaiong 27: Ki paidbah nongshong shnong jong ka thaiñ Nongtrai ba kynthup ïa ki palat 30 ei ei tylli ki shnong, ki la kyntu ïa ka tnad ka koit ka khiah jong ka sorkar jylla bad ïa u myntri ba dei peit ïa ka tnad ka koit ka khiah, ba un thaw ki lad ki lynti ban kyntiew kyrdan noh ïa ka Umsohpieng Sub Centre.
Ka sur na ki paidbah ka thaiñ Nongtrai ka long ba katkum ka jingïaid jong ka por bad ka jingroi ki paidbah nongshong shnong, katei ka Sub Centre kam lah shuh ban shakri ïa ki paidbah. Tad haduh u snem 2011 ka jingdon ki nongshong shnong, ka long kumba 5378 ngut ha katei ka thaiñ. Hynrei, kat nang mih ki snem ka jingdon ki nongshong shnong ka la nang roi bad ka jingdonkam ban pynbha ïa ka koit ka khiah ruh ka la nang dawa.
Kumta, ki la dawa na u MLA ba mynta u ba don ruh ha ka liang ka sorkar, kata u Bah Methodius Dkhar ba kumba u la sdang ban pyni shisha ïa ka jinglah jong u ban trei ha ka Mawshynrut Constituency naduh ba u long kumu MLA. Kumta ruh ki da kyrmen skhem bad angnud na ka bynta ban kyntiew kyrdan noh ïa ka Umsohpieng Sub Centre, na ka bynta ka jingmyntoi ki paidbah nongshong shnong.
Lah ban pynkynmaw ba ki riew rangbadh bad kiwei kiwei ki seng jong ka thaiñ Mawshynrut, kynthup ïa ka seng Hynñiewtrep Youths Council Nongtrai Area unit bad kiwei kiwei, ha kine ki khyndiat snem ba la lah, ki la leit ban buh jingthoh sha ki bor sorkar ban dawa kyntiew PHC noh ïa ka Umsohpieng Sub-Centre ba dei ka jaka ai jingsumar ïa ki paidbah ka thaiñ Nongtrai baroh kawei.
Ki nongïalam ka seng ki la pynpaw ba katkum ka jingïaid jong ka por bad haba peit pyrman bha ïa ka jinglong jingman ha ka thaiñ Nongtrai, la I dei ban dawa noh da ka Umsohpieng PHC ha ka jaka jong ka Umsohpieng Sub-Centre katkum ka jingdonkam jong ki shnong kaba la kot haduh palat 30 tylli ki shnong ba katei ka Centre ka ai jingshakri.
