Nongstoiñ, Ïaïong 27: Ka kynhun jong ki doctor kiba tbit jong ka Grace Cancer Foundation na ka nongbah Hyderabad ha kane ka lah sngi u blei ka 27 tarik Ïaïong ki la wan bad ïhkjat ha sor Nongstoiñ na ka bynta ban pynlong ïa ka free medical check up ha kylleng ki bynta jong ka Nongstoiñ bad katei ka free medical check up ka long beit tang ïa ki nongshong shnong kiba ka karta jong ki ka la kynjoh laiphewsnem sha jrong.
Kat kum ka jing pyntip ba la ïoh na ka ophis jong ka Distrct Medical & Health Officer West Khasi hills la ong ba ha kane ka lah sngi u blei ka kynhun jong kitei ki doctor ha ryngka jingïatreilang bad ka tnad ka koit ka khiah jong ka West Khasi hills ki la sdang ïa ka free medical check up na New Nongstoiñ sha Mawbyrshem.
Ha ka sngi hatmajai ka 28 tarik na ïew Nongstoiñ sha Mawbyrshem, ha ka sngi balang ka 29 tarik kin pynlong biang ha Mawbyrshem hajan ka Market complex, ha ka sngi palei ka 30 tarik kin pynlong ha ïew Nongstoiñ bad steshon bus Mawkyrwat, ha ka sngi thohdieng ka 01 tarik Jymmang kin leit sha ïew Rambrai.
Ha ka sngi saitjaiñ ka 02 tarik Jymmang kin leit sha Mawlieh, ha ka sngi nyngkong ka 04 tarik Jymmang kin leit sha Mawlangdep UWHC, ha ka sngi hatmajai ka 05 tarik kin leit sha Nongkynjang HWC, ha ka sngi palei ka 07 tarik Jymmang kin leit sha Sohpian UWHC, bad ha ka sngi saitjaiñ ka 09 tarik Jymmang kin leit sha ïew Maweit.
Kumta na ka liang ka District Medical & Healh Officer bad ki doctor ki la kyntu ïa ki paitbah ba kin shimkhia ban leit phah check up namar katei ka jinhg checkup ka long khlem jingsiew ei ei bad ruh ba kin sngew thuh ïa ka jing don kam jong ka jingkoit jngkhiah ka jong ki.
