Shillong, Ïaiong 27 : Ka Ophis jong u Sub- Divisional Magistrate ka Pynursla Civil Sub-Division Pynursla, ka la la pynmih ïa ka hukum ban khang ïa ki trok kiba kit palat ïa ka 9 ton ba kin ïaid najrong ka Jingkieng Dawki.
“Ka kaiphod na ka ophis jong u Asst. Executive Engineer, P. W. D (Roads), Pynursla Sub-Division ka ong ba ka jingkhia jong ki kali kit mar bad ki kali kamai kiba ïaid na katei ka jingkieng Dawki ka dei ban long hapoh ka 9.00 ton,” ong ka hukum ba la pynmih da u Sub-Divisional Magistrate ka Pynursla Civil Sub Division Bah G Warjri da kaba pyntip ruh ba halor kane la pynjari da ka kyndon 163 jong ka BNSS.
La ong ba kane ka hukum ka dei hadien ba ki kali kit mar bad ki tiar kiba ïaid na katei ka jingkieng ki dang bteng ban kit palat ïa ka jingkhia ba la buh kaba long 9 ton kaba la pynmih naduh ka 12tarik Jylliew 2024 bad kumjuh ha shwa kane.
Kane ka jingbthah ka ong ruh ba ka jingbteng bn pynkhein ïa ki kyndon ba la buh ka lah ban poi haduh u pud ba ka jingkieng ka lah ban twa kaba lah wat ban ktah ïa ka leit ka wan nalor ba ka buh jingma ïa ka jingim briew bad kiwei kiwei.
Shuh shuh la ong ba kino kino kiba pynkhein ïa kane ka kyndon kin ngat ha kaba tyngeh katkum ki kyndon jon gka Motor Vehicles(MV) act, 1988 nalor kiwei kiwei ki kyndon.
