Shillong, Naitung 15 : Ki bor pynïaid jong ka GVK EMRI ha ka sngi Thohdieng ki la kyntu ïa ki nongtrei jong ka ba kim dei satia ban pynthut ïa ka jingshakri ïa ki paidbah ba pang ba shitom khamtam eh ïa kito kiba donkam kyrkieh ïa ka.
Katei ka jingkyrpad kadei hadien ba ki nongtrei jong ka hapoh ka lama jong ka Meghalaya EMRI Workers’ Union (MEMRIWU) ki la ai por 72 kynta ïa ka sorkar jylla ba kan pynkut noh ïa ka kontrak kaba ki la dep ban soi bad ka kompeni.
“Nga shim ïa kane ka lad ban kyntu ïa ki ba kin ym pynthut ïa ka jingshakri kaban buh jingeh kylla pat ïa ki nongshong shnong kiba donkam ïa ka jingshakri ha ka por ba ki donkam kyrkieh. Ïa ki jingud jingnam jongki, dei ban pynbeit da ka jingïakren,” ong u State Head jong ka GVK EMRI 108, u Deepankar Choudhury ha ka kyrwoh.
Katkum ka jingong jong u, ki la don haduh 3 lak tylli ki jingjia ba kyrkieh ba ka EMRI ka la ïoh ban shakri nalor ba ka la ïoh ruh ban pyllait im haduh 30,000 tylli ki mynsiem briew kynthup lang ïa ki 2,500 ngut kiba leit kha khunlung.
