Buh kyndon ka RBYF ïa sorkar halor Taj Resort ha Umïam

Nongpoh, Ïaiong 24: Ka Ri-Bhoi Youth Federation (RBYF) Sengkmie mynta ka sngi ka la pynlong ïa ka jingïalang ba kyrpang jong ka Central Executive Committee ban ïakren bad shim rai halor ka jingthmu jong ka sorkar ban wanrah bad tei ïa ka Taj Resort and Spa ha Umiam, hadien ka jingmih bun ki jingkylli na ki paidbah halor ka nongrim jong ka seng.
Haba kren sha ki lad pathai khubor, u President ka seng, u Bah Bipul Thangkhiew, ha ka jingdonlang ki dkhot, u la ong ba ka RBYF kam pat shim rai ban kyrshan ne pyrshah ïa katei ka project. Hynrei, ka seng ka la buh shuwa ïa ka jingdawa ba ka sorkar ka dei ban pynurlong ïa ar tylli ki mat kiba dang sahkut, kata ka jingïapyntreikam ïa ka Inner Line Permit (ILP) bad ka jingpynheh ïa ka kad liengsuiñ ha Umroi.
U la batai ba kam don jingmut ban kyntiew ïa ka kam jngohkai pyrthei lada ka jylla kam pat don ïa ka lad kaba biang ban pdiang ïa ki nongwan jngohkai, namar haduh mynta ki liengsuiñ kiba heh kim lah ban hiar ha Umroi, kaba pynlong ïa ki nongjngohkai ban hiar ha Assam bad kaba pynmyntoi ïa ki jylla ba marjan.
Shuh shuh, u la kdew ba ka Meghalaya Legislative Assembly ha ka 19 tarik u Nohprah 2019 ka la dep ban mynjur ïa ka resolution halor ka ILP, hynrei haduh mynta kam pat treikam namar ka jingïapyntreikam ka dang sahkut ha ka Ministry of Home Affairs. U la ong ruh ba lada kine ki mat ki la urlong, ka RBYF kan long kaba nyngkong ban pdiang ïa ka Taj Resort bad kiwei ki projek kiba ïadei bad ka tourism.
Ha kaba kut, ka seng ka la pynpaw ba kam pat shim rai ba khatduh halor katei ka project, hynrei lada ym lah ban pynurlong ïa kine ki ar tylli ki mat, ka RBYF kan pyrshah beit ïa ka jingwan jong ka Taj Resort and Spa wat ha katei ka jaka kaba la thmu ban tei ha Orchid Umïam.