Don jingkyrmen ban lah rat dyngkhong ïa ka jingpang Malaria

Khliehriat ïaïong 24: Hapoh ka jingïalam u DMO-EJHD, u Dr C.S.Bareh, ka ophis jong u District Malaria Officer East Jaiñtia Hills District mynta ka sngi ka la rakhe ïa ka World Malaria Day 2026, ïa ka prokram la pynlong ha Jaiñtia Eastern College Khliehriat, la sngewthuh ba ka don ka jingkyrmen ba yn lah beit ban rat dyngkhong ïa ka jingpang malaria ha East Jaiñtia Hills District namar lyngba ka jingtrei shitom ka tnat ka koit ka khiah bad lyngba ka jinshim khia lang ki paidbah la lap ba ha East Jaiñtia Hills District don sa tang iwei iba ioh ïa ka jingpang malaria mynta u snem 2026, kane ka prokram ka don ruh ïa ka phang pdeng ‘Driven to end malaria, now we can, now we must’.
Ha kane ka prokram u Principal jong ka Jaiñtia Eastern College Khliehriat, u Dr P.Nongtdu u la long kum u kongsan bad u la kyntu ïa ki khynnah pule kiba don ha kane ka prokram ba kano kano ka jingtip ba ki ioh na ki doctor ki dei ban pynsaphriang sha kiwei kiwei ruh khnang ba kin dup tip ïa ka jingpang malaria, u la ong ruh ba ha ki por ba mynshwa ka jingpang malaria ka kynrei bha dei na ka daw ba dang duna ka stad ka tip, dang duna ki briew ki ban ïalam lynti ban sumar ïa kane ka jingpang, haba kren halor ka ktien phira jong ka jingrakhe ”Driven to end malaria, now we can, now we must’u la ong ba din ka jingkyrmen bad yn lah beit ban rat dyngkhong ïa ka jingpang malaria, wat mynta ruh la lap ba ka malaria ka la duna bha ka dng don sa tang ha ki katto, katne ki jaka hapoh ka district, u la ai ka jingkitbok kitrwiang ïa ka ophis jong u District Malaria Officer East Jaiñtia Hills District ba kane ka prokram kan long kaba jop ban pynduh jait noh syndon ïa ka jingpang malaria.
La ïoh ruh ïa ka jingbatai bad jingpynshai halor ka jingpang malaria da kaba batai bad pyni lyngba ki projector bad ïa ka jingthmu jong kane ka jingrakhe na u District Malaria Officer, East Jaiñtia Hills District, u Dr C.S.Bareh, u la ong ba kane ka jingpang ka dei kaba na ka daw ka jingshah dait ha ki pyrjong bad dei lada shah dait ha ki pyrjong kynthei ki briew ki ioh ïa kane ka jingpang malaria, u la ong ba ha ki por ba mynswa ki don bun kiba iap na ka jingpang malaria, hynrei da lyngba ka jingrei shitom ki nongtrei ka tnat ka koit ka khiah, dei ruh lyngba ka jingstad bad jingsngewthuh ki briew kiba la kloi ban wan phah test, kloi ban shim dawai te kumta ka wanrah ïa ka jinghiar kiba ïap bad kiba ioh ïa kane ka jingpang bad ruh dei namar ba ki briew ki la stad ban sumar ïa ki khun ki kti ban lait na ka jingshah dait ha ki pyrjong kumta kiba ioh jingpang malaria ki la duna bha mynta.
U la ong ruh ba ïa kiba ïoh malaria lah ban sumar ha ïing ruh da kaba shu dih ïa ki dawai ym donkam ban da thiah hospital lait noh satang lada la jur ka jingpang bad iathuh ruh ba haba jingtest malaria ka shimpor tang 10 haduh 15 minit la lah ioh ki kaiphot bad lada dei ka malaria lah ïoh ruh ban sumar noh kloi-kloi, u la batai ruh ïa ki dak ki shin kiba paw shabar lada ki briew ki ïoh ïa ka jingpang malaria bad ki nongtrei jong ka tnat ka koit ka khiah ruh ki ïakhun man la ka sngi ban ïada ïa ki briew ban lait na ka jingpang malaria
Ha East Jaiñtia Hills District, ki don hynriew tylli ki Primary Health Center bad u Dr Bareh u la pynsngew ruh ba ka tnat ka koit ka khiah ka la lap ruh ba hapoh ki lai tylli ki PHC ba kynthup ka Pamra PHC, ha Rymbai PHC bad haSaipung PHC bad ha Khliehriat Civil hospital ym don shuh ka kaiphot jong kiba pang malaria, ki don ruh sawphew tylli ki Sub Center ha kaba na ki laiphew ar tylli ki Sub Center la lap ba yn don kaiphot satia ïa kiba pang malaia lane ki sei ki zero malaria case.
Ïa ka prokram la pynïaid da u Senior Malaria Inspector, u bah Embhahmi Nongjngi bad la ïoh jingkren ruh na u Malaria Technical supervisor, u bah Kynsai Bamon, la ïa don lang ruh ki khynnah pule jong ka Jaiñtia Eastern College Khliehriat lem bad ki nongtrei jong ka tnat ka koit ka khiah.